Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 191 Hüküm no: 163 Orijinal metin no: [25b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Petro’nun bağını Kirici v. Nikola’ya satması Vilâyet-i Rumeli’nde medîne-i Yenişehir a‘mâlinden Kûhistan nâhiyesine tâbi‘ Maglaharso nâm karye ahâlîsinden Yorgi v. Petro nâm zimmî meclis-i şer‘-i hatîrde işbu râfi‘ü’r-rakīm Kirici v. Nikola nâm zimmî muvâcehesinde tav‘an ikrâr ve takrîr-i kelâm edip akd-i âti’z-zikrin sudûruna değin silk-i mülk ve zabt ve tasarrufumda olup karye-i mezbûrede bir tarafı vâdi ve bir tarafı orman ve bir tarafı merkūm Kirici bağı ve bir tarafdan yine vâdi ile mahdûd eşcâr-ı müsmire ve gayr-ı müsmireli ve bir şırahâne ve bir samanlığı hâvî kürûmu mülk bir kıt‘a bağımı, cemî‘ hukūk ve merâfıkı ile mersûm Kirici’ye iki bin altı yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi ber vech-i muharrer iştirâ ve kabûl eyleyip semeni olan meblağ-ı mezkûr iki bin altı yüz akçeyi mesfûr Kirici yedinden tamâmen ahz ve kabz eylediğimden sonra sâlifü’z-zikr bağı mahallinde zabt ve tasarrufa merkūm Kirici’yi taslît eyledim dedikde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’l-hâmis aşer min şehri Ramazâni’l-mübârek li sene tis‘în ve elf. Şuhûdü’l-hâl: Hüseyin b. Ali Çelebi Ser-bölük, Mehmed b. Eyüb, Hasan b. Abdullah, Mehmed b. Mahmud.