.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 191
Hüküm no: 164
Orijinal metin no: [25b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Dimitri v. Nikola’nın bağını Kirici v. Nikola’ya satması

Vilâyet-i Rumeli’nde medîne-i Yenişehir a‘mâlinden Kûhistan nâhiyesine tâbi‘ Maglaharso nâm karye sükkânından Dimitri v. Nikola nâm zimmî meclis-i şer‘-i şerîfde işbu râfi‘ü’r-rakīm Kirici v. Nikola nâm zimmî muvâcehesinde bi tav‘ihî ikrâr ve takrîr-i kelâm edip akd-i âti’z-zikrin sudûruna değin silk-i mülk ve zabt ve tasarrufumda olup karye-i mezbûrede vâki‘ bir tarafdan mersûm Kirici bağı ve bir tarafdan vâdi ve bir tarafdan Todori bağı ve bir tarafdan tarîk-i âm ile mahdûd kürûmu mülk bir kıt‘a bağımı, cemî‘ hukūk ve merâfıkı ile merkūm Kirici’ye bin beş yüz fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î bey‘ edip ol dahi ber vech-i muharrer iştirâ ve kabûl eyleyip semeni olan meblağ-ı mezkûr bin beş yüz akçeyi mesfûr Kirici yedinden bi’t-tamâm ve’l-kemâl ahz ve kabz eyledim ba‘de’l-yevm zikr olunan bağı mahallinde zabt ve tasarrufa merkūm Kirici’yi taslît eyledim dedikde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’l-hâmis aşer min şehri Ramazâni’l-mübârek li sene tis‘în ve elf.


Şuhûdü’l-hâl: Hüseyin Çelebi b. Ali, Mehmed b. Eyüb, Mehmed b. Mahmud, Hasan b. Abdullah ve gayruhüm.