Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 192 Hüküm no: 166 Orijinal metin no: [25b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Hacı Bâli’nin boşandığı eşi Hacı Mustafa b. Hüseyin’de alacağı olduğu Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-’de Baba Haydar mahallesi sâkinelerinden işbu râfi‘atü’l-vesîka Hatice bt. el-Hâc Bâli nâm hâtun meclis-i şer‘-i hatîr-i lâzımü’t-tevkīrde el-Hâc Mustafa b. Hüseyin nâm râcil mahzarında üzerine da‘vâ ve takrîr-i kelâm edip mezbûr el-Hâc Mustafa zevcim olup târih-i kitâbdan bir gün mukaddem talâk-ı selâse ile beni tatlîk etmeğin zimmetinde mütekarrir ve ma‘kūdun-aleyh altı yüz akçe mehr-i müeccel hakkım ile nafaka-i iddet ve me’ûnet-i süknâm için dahi dört yüz elli akçe ki min haysü’l-mecmû‘ bin elli akçe hakkımı taleb ederim suâl olunup alıverilmesi murâdımdır dedikde gıbbe’s-suâl mezbûr el-Hâc Mustafa cevâbında fi’l-hakīka müdde‘iyye-i mezbûre Hatice zevcem olup târih-i merkūmda talâk-ı selâse ile tatlîk edip ve zimmetimde mütekarrir ve ma‘kūdun-aleyh altı yüz akçe mehr-i müeccel hakkı ile nafaka-i iddet ve me’ûnet-i süknâsı için dört yüz elli akçe ki min haysü’l-mecmû‘ mezbûre Hatice’ye bin elli akçe lâzımü’l-edâ ve vâcibü’l-kazâ deynimdir deyû bi tav‘ihî ikrâr ve i‘tirâf etmeğin alâ mûcebi i‘tirâfihî meblağ-ı mersûm bin elli akçeyi medîne-i mezbûre Hatice’ye edâ ve teslîme mezbûr el-Hâc Mustafa’ya tenbîh birle mâ hüve’l-vâki‘ kayd şüd. Fi’l-yevmi’s-sâlis aşer min şehri Ramazâni’l-mübârek li sene tis‘în ve elf. Şuhûdü’l-hâl: Hüseyin Bey b. Ali, Mehmed b. Eyüb, Mehmed b. Mahmud, Ali b. Abdullah, Ali b. Hüseyin ve gayruhüm.