Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 193 Hüküm no: 167 Orijinal metin no: [25b-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Ağa b. Hüseyin’in Hacı Ramazan b. Murad’ın evini satın almışken sonra vazgeçtiği Düstûr-ı mükerrem müşîr-i müfahham vezîr-i sânî müsâhib-i şehriyârî devletlü ve sa‘âdetlü Mustafa Paşa hazretlerinin sâbıkan şâtırbaşısı olan Ali Ağa b. Hüseyin meclis-i şer‘-i şerîfde işbu râfi‘ü’l-kitâb el-Hâc Ramazan b. Murad nâm kimesne mahzarında ikrâr-ı tâm ve takrîr-i kelâm edip medîne-i Üsküdar’da Hayreddin Çavuş mahallesinde vâki‘ bir tarafdan mahalle-i mezbûre mescidinin imâm ve müezzinine meşrûta menzil ve bir tarafdan Kadı bahçesi ve bir tarafdan el-Hâc Ahmed veresesi hanı ve bir tarafdan tarîk-i âm ile mahdûd mukaddemâ üç bâb fevkānî odayı ve üç sofayı ve bir bâb tahtânî odayı ve bir ahırı ve iki su kuyusunu ve bir kenîfi ve bahçeyi müştemil olup senede merhûm Hayreddin Çavuş vakfı’na yüz akçe mukāta‘a-i kadîmesi olan mülk menzil ile menzil-i mezkûrda mevcûd cedîd ve atîk kereste ve tahmînen beş bin padavra ve ma‘lûmü’l-mikdâr mismâr mezbûr el-Hâc Ramazan’ın mülkü olmağla târih-i kitâbdan üç buçuk ay mukaddem bana beş yüz elli esedî guruşa bi safkatin vâhidetin bey‘ ve teslîm ben dahi ber vech-i muharrer iştirâ ve tesellüm ve kabûl etmişidim el-hâletü hâzihî meblağ-ı mezkûru edâya iktidârım olmamağla kendi hüsn-i ihtiyârımız ile bey‘-i mezbûru fesh ve emlâk-i merkūmeyi mezbûr el-Hâc Ramazan Beşe’ye alâ tarîki’l-ikāle teslîm eyledim ol dahi tarîk-i mezbûr üzre kabz ve tesellüm eyledi ba‘de’l-yevm emlâk-i mezkûrede vechen mine’l-vücûh benim alâka ve medhalim yokdur, mezbûr el-Hâc Ramazan keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’s-sâdis aşer min Ramazâni’l-mübârek li sene tis‘în ve elf. Şuhûdü’l-hâl: Umdetü’l-a‘yân Hasan Ağa Kethüdâ-yı müsâhib, Fahrü’l-akrân Mustafa Ağa Kethüdâ-yı Hatice Sultan, Ali Beşe b. Veli, Derviş Ahmed b. ( ), İbrahim b. Mehmed, Osman b. Receb.