Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 193 Hüküm no: 168 Orijinal metin no: [26a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmail b. Rüstem’in borcuna karşılık olarak Bâzirgânbaşı İsmail Efendi Vakfı’na rehin verdiği evin vârislerine teslim olunması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de vâki‘ Bâzirgânbaşı İsmail Efendi vakfı’na bi’l-fi‘l mütevellî olan Mahmud Çelebi b. Receb nâm kimesne tarafından husûs-ı âti’l-beyânı ikrâra vekîl olup hasm-ı câhid mahzarında Osman Çelebi b. Mehmed ve Şaban b. Bâli nâm kimesneler şehâdetleriyle şer‘an vekâleti sâbite olan İbrahim Çelebi b. Yakub nâm kimesne meclis-i şer‘-i şerîfde medîne-i mezbûrede Câmi‘-i Kebîr mahallesi sükkânından iken bundan akdem fevt olan İsmail Efendi b. Rüstem nâm müteveffânın sulbî kebîr oğulları Süleyman ve Abdullah mahzarlarında bi’l-vekâle ikrâr-ı tâm ve takrîr-i kelâm edip mezbûrân Süleyman ve Abdullah’ın babaları müteveffâ-yı mezbûr İsmail Efendi hâl-i hayât ve sıhhatinde vakf-ı mezbûr malından olmak üzre mütevellî-i mezbûr Mahmud Çelebi yedinden üç yüz altmış altı esedî guruş istikrâz ve ahz ve kabz edip mukābelesinde kendi emlâkinden olup mahalle-i mezbûrede vâki‘ beynlerinde hudûdu ma‘lûm mülk menzilini alâ tarîki’l-istiğlâl rehin vaz‘ etmişidi ve meblağ-ı merkūma oğulları mezbûrân Süleyman ve Abdullah kefîl olmuşlardı el-hâletü hâzihî meblağ-ı merkūmu müvekkilim mütevellî-i mezbûr Mahmud Çelebi mezbûrân Süleyman ve Abdullah yedlerinden tamâmen cânib-i vakf-ı mezbûr için ahz ve istîfâ ve fekk-i rehin etmişdir ba‘de’l-yevm meblağ-ı merkūmdan mezbûrân Süleyman ve Abdullah zimmetlerinde cihet-i kefâletden ve asâletden bir akçe ve bir habbe bâkī kalmadı meblağ-ı merkūma ve menzil-i mezkûra müte‘allika da‘vâda mezbûrân Süleyman ve Abdullah Çelebilerin zimmetleri müvekkilim mezbûr Mahmud Çelebi ibrâ-i âmm-ı kātı‘ü’n-nizâ‘ ile ibrâ ve iskāt eyledi ba‘de’l-yevm meblağ-ı mezbûra müte‘allika yedimde memhûr ve mümzâ temessükü ve hüccetleri dahi bulunur ise amel olunmaya dedi dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’r-râbi‘ aşer [min şehri Ramazâni’l-mübârek] li sene tis‘în ve elf. Şuhûdü’l-hâl: Yusuf b. Ahmed, İbrahim Çelebi b. Mustafa, Veli Beşe b. Ali, Ahmed Beşe b. Mahmud, Musa Bey b. Mehmed ve gayruhüm.