Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 348 Hüküm no: 398 Orijinal metin no: [55a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmihan bt. Mehmed’in, Hibetullah bt. Mehmed’e ödünç ve ariyet borcu olduğu Mahmiye-i İstanbul’da Gedik Paşa kurbunda Dîvâne Ali mahallesi sâkinelerinden İsmihan bt. Mehmed nâm hâtun meclis-i şer‘-i şerîf lâzımü’t-tevkīrde işbu bâ‘isetü’l-kitâb Hibetullah bt. Halil nâm hâtun mahzarında ikrâr ve takrîr-i kelâm edip mezbûre Hibetullah’a cihet-i deyn-i şer‘îden doksan iki esedî guruş zimmetimde vâcibü’l-kazâ deynim olup ve beynimizde de ma‘lûm yirmi iki miskāl altından masnû‘ bir tek bilezik ve beş esedî guruş kıymetli beynimizde ma‘lûm yemeni taşlı bir hâtemi bi tarîki’l-âriye yedimdedir deyû bi tav‘ihâ ikrâr ve i‘tirâf eyledikde mukırre-i mezbûreyi kelimât-ı meşrûhasında mezbûre Hibetullah vicâhen tasdîk ve şifâhen tahkīk ettikden sonra mahalle-i mezbûre sâkinlerinden Davud b. Osman nâm kimesne mezbûre İsmihan’ın nefsine ve hîn-i mütâlebede meclis-i şer‘a ihzârına emr ve kabûl[ü] hâviye kefâlet-i sahîha-i şer‘iyye ile kefîl olmağın mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min Recebi’l-ferd li sene seb‘a ve seb‘în ve elf. Şuhûdü’l-hâl: Ali Çavuş b. ( ) el-Mübâşir, Davud b. Osman, Mehmed Beşe er-Râcil, Mehmed Çelebi b. Abdullah, Mehmed Beşe b. Mustafa, Şükrullah Bey b. Abdullah, Hasan Çelebi b. Ahmed, Mustafa Çelebi b. Ahmed, İbrahim Çelebi b. Ahmed, Mehmed Beşe, Veli Beşe b. Mahmud, Baba Resul b. Rıdvan.