Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 194 Hüküm no: 169 Orijinal metin no: [26a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Lökene bt. Martime çiftliğini Sâlih Beşe b. Mehmed’e satması Mahmiye-i İstanbul’da el-Hâc Muhyiddin mahallesinde sâkine Lökene bt. Martime nâm nasrâniyyenin sadrî kebîr oğlu ve tarafından husûs-ı âti’l-beyânı ikrâra vekîl olup Süleyman b. Ali ve Hüseyin b. Hasan nâm kimesneler şehâdetleriyle şer‘an vekâleti sâbite olan İstefan v. Radol nâm zimmî meclis-i şer‘-i şerîfde işbu râfi‘ü’l-vesîka Sâlih Beşe b. Mehmed mahzarında bi’l-vekâle ikrâr ve takrîr-i kelâm edip Havâss-ı Aliyye kazâsına tâbi‘ Terkos nâhiyesi müzâfâtından Arnavud nâm karyede vâki‘ bir tarafı Nikola mülkü ve bir tarafı Sağıroğlu Yorgo zimmî mülkü ve bir tarafı Laskari v. Yani zimmî mülkü ve bir tarafı tarîk-i âm ile mahdûd dört bâb tahtânî odayı ve tahta-pûşu ve tahtında bir mahzeni ve ahırı ve fırını ve anbarı ve menzil-i mezbûra muttasıl iki bâb tahtânî odayı ve bahçeyi ve öküz ahırı ve samanlığı ve sundurmayı ve harman yerini müştemil çiftlik ta‘bîr olunur menzili müvekkilem anam merkūme Lökene târih-i kitâbdan üç ay mukaddem mezbûr Sâlih ile karındaşı İbrahim ve li ebeveyn er karındaşları İlyas nâm müteveffânın oğulları Abdülbâkī ve Mustafa nâm kimesnelerden yedi yüz esedî guruşa iştirâ ve tesellüm ve kabûl ve def‘-i semen etmişidi hâlâ anam müvekkilem mersûme iştirâsına nâdime olmağla menzil-i mahdûd-ı mezkûru tekrâr mezbûr Sâlih Beşe’ye evvelki semeninden yüz elli esedî guruş noksan olmak üzre beş yüz elli esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm ve kabûl eyledikden sonra semeni olan meblağ-ı mezkûr beş yüz elli esedî guruşun dört yüz guruşunu merkūm Sâlih Beşe yedinden tamâmen ahz ve kabz edip bâkī yüz elli guruşunu târih-i kitâbdan yüz seksen gün tamâmında edâ ve teslîm etmek üzre te’cîl eyledim ba‘de’l-yevm çiftlik-i merkūm mezbûr Sâlih Beşe’nin mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’l-âşir min şehri Ramazâni’l-mübârek li sene tis‘în ve elf. Şuhûdü’l-hâl: İbrahim Ağa b. Süleyman Haseki, Osman Beşe b. Mehmed, Hüseyin b. Hasan, Mustafa Beşe b. Mehmed, Ahmed Beşe b. Ali, Ahmed Efendi b. Ali, Hüseyin b. Muharrem, İbrahim b. İsa.