Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 195 Hüküm no: 170 Orijinal metin no: [26a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vildan bt. Abdullah ile üvey kızı Havva bt. Hasan’ın müşterek evlerinin aralarında paylaştırılması Zikri âtî menzilin ba‘de’l-keşf ve’l-mesâha taksîm ve ifrâz ve ketb ve tahrîri iltimâs olunmağın savb-ı şer‘-i münîrden mevlânâ Mehmed Efendi b. Nasuh irsâl olunup ol dahi hâssa mi‘mârlarından Üstâd Ali Beşe b. Abdullah ve sâir sukūf ve ebniye ahvâline vukūf ve şu‘ûru olup zeyl-i kitâbda muharrerü’l-esâmî müslimîn ile medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Emir Buhârî mahallesinde vâki‘ bir tarafı Şaban Efendizâde Abdullah Efendi tasarrufunda olan bahçe ve bir tarafı Mevkūfâtî Mustafa Efendizâde bahçesi ve bir tarafı İmâm el-Hâc Mehmed b. Ali tasarrufunda olup Hatice Hanım vakfı’ndan olan menzil ve bir tarafı tarîk-i hâs ile mahdûd bir fevkānî oda ve bir ahırı ve bir sundurma ve bi’r-i mâ ve kenîfi ve eşcâr-ı müsmire ve gayr-ı müsmire bahçeyi müştemil olup arsasının merhûme Âişe Hâtun nâm sâhibetü’l-hayrın vakfına senede yirmi beş akçe ücret-i müeccelesi olup binâsı mülk olan menzil-i mezkûra varıp müslimîn-i mezkûrîn huzûrunda akd-i meclis-i şer‘-i mübîn eyledikde menzil-i mezkûrda sâkine işbu râfi‘ateyi’r-rakīm Vildan bt. Abdullah ile üvey kızı Havva bt. Hasan nâm hâtunlar meclis-i ma‘kūd-ı mezkûrda her biri takrîr-i kelâm ve ta‘bîr ani’l-merâm edip işbu menzil ale’l-iştirâki’s-seviy mülk-i mevrûsumuz olup lâkin bu âna değin her birimizin nısf hissesi müte‘ayyin ve müfrez olmamağla menzil-i mezkûr huzûr-ı müslimînde taksîm ve her birimizin nısf hisse-i şer‘iyyesi ifrâz olunup her birimizin hissesine alâmet-i fâsıla nasb ve ta‘yîn olunması matlûbumuzdur dediklerinde mi‘mâr-ı mezbûr Ali Beşe meclis-i ma‘kūd-ı mezbûrda menzil-i mezkûrdan fevkānî bir bâb oda ma‘ahû zemîni mesâha eyledikde tûlen on zirâ‘ ve arzen beş zirâ‘ bi hesâb-ı terbî‘î elli zirâ‘a bâliğ olup ve yine menzil-i mezkûrdan bir köhne ahırı ve bir sundurmayı zemînler ile ma‘an mesâha eyledikde tûlen on dört ve arzen beş zirâ‘ bi hesâb-ı terbî‘î yetmiş zirâ‘a bâliğ olup ve yine menzil-i mezkûr müştemilâtından arsa-i sırfamı mesâha eyledikde tûlen ve arzen bi hesâb-ı mezbûr dört yüz kırk altı zirâ‘a bâliğ olduğu mütehakkik oldukdan sonra menzil-i mezkûrdan binâ ma‘a zemîn elli zirâ‘ bir bâb oda-i mezkûre ile arsa-i sırfa-i mezkûreden iki yüz yirmi üç zirâ‘ arsa ifrâz olunup mezbûre Havva’nın menzil-i mezkûrdan nısf hisse-i şer‘iyyesi için ta‘yîn ve tahsîs ve alâmât-ı fâsıla vaz‘ olundu. Yine menzil-i mezkûrdan binâ ma‘a zemîn olan sâlifü’z-zikr ahır-ı mezbûr ve sundurma-i mezbûre ve bi’r-i mâ ve arsa-i sırfa-i mezkûreden iki yüz yirmi üç zirâ‘ arsa-i sırfa dahi ifrâz olunup mezbûre Vildan’ın menzil-i mezkûrdan olan nısf hisse-i şer‘iyyesi için ta‘yîn ve tahsîs ve alâmât-ı fâsıla nasb ve vaz‘ olunduğunu mevlânâ-yı mezbûr mahallinde tahrîr ba‘dehû ma‘an irsâl olunan Mehmed b. Eyüb ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a kayd şüd. Fi’l-yevmi’s-sâlis aşer min Ramazâni’l-mübârek li sene tis‘în ve elf. Şuhûdü’l-hâl: El-Hâc Mehmed Efendi b. Ali el-İmâm, Mahmud Çelebi b. Ahmed, Mehmed b. Mahmud, Ahmed b. Hüseyin, Yusuf b. Mehmed.