Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 196 Hüküm no: 171 Orijinal metin no: [26a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Abdülkâdir’in çiftliğini Ali Beşe b. Abdullah ile karısı Ümmühani bt. Mehmed’e satıp tarlasının da tasarruf hakkını devretmesi Mahmiye-i İstanbul’da Hocapaşa kurbunda Hobyar mahallesi sâkinelerinden Sâliha bt. Abdülkādir Efendi tarafından husûs-ı âti’l-beyânı ikrâra vekîl olup hasm-ı câhid mahzarında mezbûrenin zâtını ma‘rifet-i şer‘iyye ile ârifân olan el-Hâc Hüseyin b. Mehmed ve Ali b. Mustafa şehâdetleriyle şer‘an vekâleti sâbite olan Ahmed Bey b. Mehmed meclis-i şer‘-i şerîfde işbu bâ‘iseyi’l-kitâb kendi tarafından asâleten ve zevce-i menkûhası Ümmühâni bt. Mehmed tarafından ikrâr-ı âti’l-beyânı tasdîke vekîl-i sâbitü’l-vekâlesi olan Ali Beşe b. Abdullah mahzarında bi’l-vekâle ikrâr ve takrîr-i kelâm edip müvekkilem mezbûre Sâliha Hâtun akd-i âti’z-zikrin sudûruna değin silk-i mülk-i sahîhinde münselik olup Havâss-ı Aliyye kazâsına tâbi‘ Kağıdhâne nâm karyede vâki‘ bir tarafı Müezzin Mehmed Halîfe b. Ahmed mülkü ve bir tarafı Ali Bey b. Abdullah mülkü ve bir tarafı tekye ve bir tarafı tarîk-i âm ile mahdûd iki bâb fevkānî oda ve iki ahır ve bir harâbe hamam ve havlu ve bi’r-i mâ ve zât-ı eşcâr-ı müsmire ve gayr-ı müsmire bahçe ve ana muttasıl harâbe bir kıt‘a bağ yerini müştemil çiftlik ta‘bîr olunur mülk menzilini cemî‘ tevâbi‘ ve levâhıkı ile mezbûr Ali Beşe’ye ve zevcesi müvekkile-i mezbûre Ümmühâni’ye ale’l-iştirâki’s-seviy mutasarrıf olmak üzre iki yüz kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm anlar dahi minvâl-i muharrer üzre iştirâ ve tesellüm ve kabz ve kabûl eylediklerinden sonra yine müvekkilem merkūmenin zabt ve [26b] tasarrufunda olup her birinin hudûdu beynlerinde ma‘lûm Cevizderesi nâm mahalde vâki‘ tahmînen otuz keyl tohum istî‘âb eder bir kıt‘a ve baruthâne mukābelesinde vâki‘ tahmînen yirmi keyl tohum istî‘âb eder bir kıt‘a ve karye-i mezbûrede vâki‘ tahmînen iki keyl tohum istî‘âb eder bir kıt‘a ve mekābir-i müslimîn kurbunda vâki‘ tahmînen bir keyl tohum istî‘âb eder bir kıt‘a ki cem‘an dört kıt‘a tarlalarının dahi hakk-ı tasarruflarına bi izni’l-mütevellî mezbûr Ali Beşe’ye ve zevcesi müvekkile-i mezbûre Ümmühâni’ye ale’l-iştirâki’s-seviy elli esedî guruş bedel mukābelesinde tefvîz bi’l-ferâğ edip anlar dahi minvâl-i muharrer üzre tefevvuz ve kabûl eyleyip semen-i mezbûr ile bedel-i merkūm cem‘an iki yüz elli esedî guruşu mezbûr Ali Beşe ve Ümmühâni yedlerinden bi’t-tamâm ahz ve kabz eyledim ba‘de’l-yevm çiftlik ta‘bîr olunur menzil ve arâzi-i merkūmda alâka ve medhalim yokdur, çiftlik-i mezbûr merkūm Ali Beşe ile zevcesi mezbûre Ümmühâni ile ale’l-iştirâki’s-seviy mülk-i müşterâsı ve arâzi-i merkūme taht-ı tasarrufları olmuşdur keyfe mâ yeşâ’ân mutasarrıfân olsunlar dedi dedikde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’s-sâdis aşer min şehri Ramazâni’l-mübârek li sene tis‘în ve elf. Şuhûdü’l-hâl: Ali Çelebi b. Mehmed, Mehmed b. Abdullah, Ali b. Mehmed, Mustafa b. Abdullah, Avnullah Efendi el-Hatîb, Receb Efendi b. Yusuf.