Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 197 Hüküm no: 172 Orijinal metin no: [26b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Anadolu eski kazaskeri Mustafa Efendi’nin fırınında çalışan zimmilere borç vermesi Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de sâkin ekmekçi tâifesinden Donvak v. Magridi ve Melkon v. Gasber ve Tarsez v. Zora ve İsteryoz v. Zora nâm Ermeniler meclis-i şer‘-i şerîfde sâbıkan sadr-ı Anadolu olan a‘lemü’l-ulemâ’i’l-mütebahhirîn efdalü’l-fuzalâ’i’l-müteverri‘în keşşâfü’l-müşkilâti’d-dîniyye hallâlü’l-mu‘dilâti’l-yakīniyye câmi‘ü’l-fürû‘ ve’l-usûl hâvi’l-ma‘kūl ve’n-nükûl sa‘âdetlü Mustafa Efendi hazretleri taraf-ı bâhirü’ş-şereflerinden ikrâr-ı âti’l-beyânı tasdîke vekîl-i sâbitü’l-vekâleleri olan el-Hâc Veli Ağa b. Eyüb mahzarında her biri ikrâr ve takrîr-i kelâm edip müvekkil-i mûmâ-ileyh Mustafa Efendi hazretleri medîne-i mezbûre mahallâtından Nişancı Paşa mahallesinde vâki‘ lede’l-ahâlî ve’l-cîrân ma‘lûmü’l-hudûd mülk ekmekçi fırını ale’l-iştirâki’s-seviy ekmek tabh etmek için beher yevm yüz otuz beşer akçeden her otuz gün tamâmında dört bin elli akçe ücret vermek üzre ben îcâr ve teslîm biz dahi minvâl-i muharrer üzre ale’l-iştirâk istîcâr ve tesellüm ve kabz ve kabûl eyledik dediklerinde gıbbe’t-tasdîki’ş-şer‘î mezbûrûn Donvak ve Melkon ve Tarsez ve İstersor meclis-i mezbûrda vekîl-i mezbûr el-Hâc Veli Ağa mahzarında her biri i‘âde-i kelâm edip müvekkil-i mûmâ-ileyh Mustafa Efendi hazretlerinin kendi mallarından olmak üzre yed-i şerîfelerinden ale’l-iştirâki’s-seviy deynimiz olmak üzre beş yüz esedî guruş istikrâz ve ahz ve kabz eyledik hâlâ müvekkil-i müşârün-ileyh efendi hazretlerine zimmetimizde lâzımü’l-edâ ve vâcibü’l-kazâ beş yüz esedî guruş deynimizdir dediklerinden sonra meblağ-ı mezbûrdan dahi her birimizin zimmetine edâsı lâzım gelen mala her birimiz emr ve kabûlü hâviye kefâlet-i sahîha-i şer‘iyye ile kefîl olduk dediklerinde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’s-sâbi‘ aşer min şehri Ramazâni’l-mübârek li sene tis‘în ve elf. Şuhûdü’l-hâl: Ahmed Efendi b. Mehmed, Mehmed Efendi b. eş-Şeyh Mehmed, Mustafa Efendi b. Osman, Mustafa b. Sinan, Receb Efendi b. Mehmed, Mehmed b. Hasan.