Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 198 Hüküm no: 173 Orijinal metin no: [26b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şeyh Cafer’in mirası için vârislerinin vekil tayin etmesi Vilâyet-i Anadolu’da Kangırı kasabası mahallâtından Câmi‘-i Kebîr mahallesi sükkânından olup hâlâ medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Takyecibaşı mahallesinde müsâfiren mütemekkin olan eş-Şeyh Mehmed Çelebi b. eş-Şeyh Cafer meclis-i şer‘-i şerîfde işbu râfi‘ü’l-kitâb Mahmud Ağa b. el-Hâc Mustafa mahzarında ikrâr ve takrîr-i kelâm edip bundan akdem vefât eden babam mezbûr Şeyh Cafer’in vâlidem Melekan bt. Ahmed’in muhallefâtlarına vâzı‘ayi’l-yed olan üvey babam Mehmed b. Yusuf ile kız karındaşım Sâliha’dan ve sâir muhallefât-ı müteveffiyân-ı mezbûrâna vaz‘-ı yed edenlerden benim hisse-i şer‘iyyeme âid olan hisse-i şer‘iyyemi da‘vâ ve taleb ve ahz ve kabz ve iktizâ ederse sulh ve ibrâya ve bedel-i sulhu ahz ve kabz ve bana îsâle ve lede’l-hükkâmi’l-kirâm mürâfa‘a ve muhâsamaya ve kabz ve îsâl mütevakkıf olduğu umûrun küllîsine tarafımdan mezbûr Mahmud Ağa’yı vekîl ve nâib-i menâb nasb ve ta‘yîn eyledim dedikde ol dahi vekâlet-i mezbûreyi kabûl ve merâsimini edâya müte‘ahhid ve iltizâm etmeğin mâ vaka‘a kayd şüd. Fi’l-yevmi’r-râbi‘ aşer min şehri Ramazâni’l-mübârek li sene tis‘în ve elf. Şuhûdü’l-hâl: Abdullah Efendi b. Osman Efendi, Mehmed Efendi b. ( ), Fazlullah Efendi b. ( ), Ali Efendi b. el-Hâc Ali, Ramazan b. Mustafa, Mehmed b. Mustafa, el-Hâc Hüseyin b. Rıdvan.