Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 199 Hüküm no: 174 Orijinal metin no: [26b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Mustafa ile Yusuf b. Abdullah’ın uygunsuz vaziyette yakalandıkları Medîne-i Hazret-i Ebâ Eyyûb el-Ensârî’de vâki‘ kolluk çorbacısı olan fahrü’l-akrân Bektaş Ağa’nın odasına ta‘yîn olunan neferâtın bayrakdârı ve medîne-i mezbûre çorbacısı işbu râfi‘ateyi’l-vesîka Ahmed Bey b. Süleyman ile Musa Bey b. Mehmed meclis-i şer‘-i şerîfe gelip takrîr-i kelâm ve bast-ı merâm edip medîne-i mezbûrede çömlekçiler kârhânesi içinde vâki‘ şişehânenin dâhilinde Emine bt. Mustafa nâm hâtun kendiye nâ-mahrem Yusuf b. Abdullah ile bir yerde oturur hâlâ mu‘âmele-i fuhş üzre oldukları mesmû‘umuz olmağın kıbel-i şer‘den üzerine varılıp ba‘de’l-keşf mûceb-i şer‘îsi icrâ olunmak matlûbumuzdur dediklerinde savb-ı şer‘den mevlânâ es-Seyyid Ârif Mehmed Efendi b. Mustafa irsâl olunup ol dahi zeyl-i kitâbda muharrerü’l-esâmî müslimîn ile işbu târih-i kitâba gelince ba‘de’l-işâ sâlifü’z-zikr şişehâneye varıp keşf ve nazar olunduklarında fi’l-vâki‘ merkūme Emine kendiye nâ-mahrem olan mezbûr Yusuf ile bir yerde oturup hâlâ mu‘âmele-i fuhş üzre olduklarını mu‘âyene ve müşâhede eylediklerinden sonra mezbûrân suâl olundukda her biri âhar için kendiye nâ-mahrem olduğunu tav‘an ikrâr ve i‘tirâf etmeğin mevlânâ-yı mezbûr mahallinde tahrîr ba‘dehû ma‘an irsâl olunan Ali b. Abdullah ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a kayd şüd. Fî 11 Ramazân sene [10]90. Şuhûdü’l-hâl: Süleyman b. Ali, Ahmed Beşe b. Mehmed, Mehmed Beşe b. Ali, Hüseyin b. Ali, Hüseyin b. Mehmed, Halil b. Ali.