Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 200 Hüküm no: 176 Orijinal metin no: [27a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İvaz Beşe b. Mehmed’in Zafiri v. Aleksandri’de alacağı olması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Câmi‘-i Kebîr mahallesi sükkânından işbu râfi‘ü’l-vesîka İvaz Beşe b. Mehmed meclis-i şer‘-i hatîr-i lâzımü’t-tevkīrde Zafiri v. Aleksandri nâm zimmî muvâcehesinde üzerine da‘vâ ve takrîr-i kelâm edip mezbûr Zafiri zimmetinde beynimizde vezn ve kantarı ilm-i şer‘î birle ma‘lûm kuru siyah üzüm bahâsından ba‘de küllî hesâb yirmi beş buçuk kıt‘a esedî guruş hakkım olup hâlâ taleb eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Zafiri cevâbında fi’l-hakīka müdde‘î-i mezbûr İvaz Beşe’ye beynimizde vezn [ve] kantarı ilm-i şer‘î birle ma‘lûm kuru siyah üzüm bahâsından ba‘de külli’l-hesâb yirmi beş buçuk kıt‘a esedî guruş zimmetimde lâzımü’l-edâ ve vâcibü’l-kazâ deynimdir deyû bi tav‘ihî ikrâr ve i‘tirâf etmeğin alâ mûcebi i‘tirâfihî meblağ-ı mezbûr yirmi beş buçuk esedî guruşu müdde‘î-i mezbûra edâ ve teslîme mezbûr Zafiri’ye tenbîh birle mâ vaka‘a kayd şüd. Fi’l-yevmi’l-hâdî ve’l-ışrîn min şehri Ramazâni’l-mübârek li sene tis‘în ve elf. Şuhûdü’l-hâl: Mehmed b. Mahmud, Mehmed b. Eyüb, Hüseyin b. Ali, Ali b. Abdullah, Dilâver b. Abdullah.