Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 201 Hüküm no: 177 Orijinal metin no: [27a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâlih Çelebi b. Mehmed’in Lökene bt. Martime’ye borcu olması Mahmiye-i İstanbul hısnı ebvâbından Edirnekapısı dâhilinde Ali Paşa-yı Atîk mahallesinde sâkin Sâlih Çelebi b. Mehmed meclis-i şer‘-i şerîfde işbu râfi‘atü’l-vesîka Lökene bt. Martime nâm nasrâniyyenin sadrî kebîr oğlu ve tarafından tasdîk-i âti’l-beyâna vekîl olup mesfûrenin zâtını ma‘rifet-i şer‘iyye ile ârifân olan Süleyman Bey b. Ali ve Hüseyin Çelebi b. Hasan şehâdetleriyle şer‘an vekâleti sâbite olan İstefan v. Radol nâm zimmî muvâcehesinde ikrâr ve takrîr-i kelâm edip müvekkile-i merkūme Lökene’ye hudûdu beynimizde ma‘lûm çiftlik ta‘bîr olunur menzil semeninden târih-i kitâbdan yüz seksen gün tamâmına değin müeccel yüz elli esedî guruş ve altın kakma bir sîm divit semeninden dahi elli esedî guruş ki cem‘an târih-i mezkûr tamâmında müvekkile-i merkūmeye iki yüz esedî guruşu lâzımü’l-edâ deynimdir dedikde vekîl-i merkūm dahi mezbûr Sâlih’den sâdır olan ikrâr-ı mezbûrunu ba‘de’t-tasdîk meblağ-ı merkūmu ecel-i mezkûr hulûlünde müvekkile-i mersûme [Lökene bt.] Martime’ye edâ ve teslîme tenbîh birle mâ vaka‘a bi’t-taleb kayd olundu. Fî 10 Ramazâni’l-mübârek sene [10]90. Şuhûdü’l-hâl: İbrahim Bey b. Süleyman el-Haseki, Osman Beşe b. Mehmed, Hüseyin b. Hasan, Mustafa Beşe b. Mehmed, Ahmed Beşe b. Ali ve gayruhüm.