Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 201 Hüküm no: 178 Orijinal metin no: [27a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Argiri’nin terekesinin vârisi Dimitri’ye teslim edilmesi Fi’l-asl vilâyet-i Rum[eli’nde] Silistire kazâsına tâbi‘ Koline nâm karye ahâlîsinden olup mahrûse-i Galata mahallâtından Sultan Bayezid mahallesinde sâkin iken bundan akdem hâlik olan Bodur Nikola v. Argiri nâm zimmînin verâseti yedinde olan nakl-i şer‘î ile sâbit olan li ebeveyn er karındaşı Dimitri v. Argiri nâm zimmî meclis-i şer‘-i hatîr-i lâzımü’t-tevkīrde hîn-i helâkinde yanında mevcûd olmağla muhallefâtına vâzı‘ü’l-yed olan işbu râfi‘ü’r-rakīm İstirati v. Mavridi nâm zimmî muvâcehesinde ikrâr ve i‘tirâf edip mezbûr İstirati tarafından mûrisim hâlik-i mezbûrun muhallefâtından nakid yüz yetmiş esedî guruş ve dört çift sîm bıçak ve on dört münakkaş makrama ve bir sırma kuşak ve beyaz don kuşak ve bir peşkir ve bir samur kalpak ve bir küçük kalpak ve bir kadife kaftan ve bir köhne kaftan ve bir billur tas ve bir altın hâtem ve bir sîm sâ‘atini mezbûr İstirati hâlik-i mesfûrun vârisi olmak zu‘muyla bundan akdem ahz ve kabz etmişdir hâlâ ben kazâ-i mezbûra nakl-i şer‘î ile gelip verâsetimi isbâtdan sonra zikr olunan eşyâyı bi’l-cümle mezbûr İstirati yedinden verâsetim hasebiyle bi’t-tamâm ahz ve kabz eyledim ba‘de’l-yevm hâlik-i mezbûrun muhallefâtına ve zikr olunan eşyâya müte‘allika da‘vâda mezbûr İstirati’nin zimmetini ibrâ-i âm ile ibrâ ve iskāt eyledim dedikde gıbbe’t-tasdîk [mâ vaka‘a bi’t-taleb kayd olundu]. Fî 21 Ramazân sene [10]90. Şuhûdü’l-hâl: Hasan Ağa b. Süleyman, Mahmud Beşe b. Hüseyin, Hasan Ağa b. Ahmed, Süleyman [b.] Abdi, Ramazan [b.] Mehmed, Osman b. Mehmed.