Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 349 Hüküm no: 399 Orijinal metin no: [55a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. es-Seyyid Mustafa Çelebi’nin el-Hâc Mehmed’in oğlu olduğu ve babasından intikal eden terekesini vasîsinden aldığı Mahmiye-i İstanbul’da Bâli Ağa mahallesinde sâkin iken bundan akdem vefât eden el-Hâc Mehmed’in oğlu olup hîn-i vefâtında sagīr ve hâlâ kebîr olan es-Seyyid Mustafa Çelebi mahfil-i kazâda hâl-i sıgārında kıbel-i şer‘den mansûbe vasîsi olan işbu bâ‘isetü’l-kitâb Meryem bt. Ramazan nâm hâtun mahzarında ikrâr ve takrîr-i kelâm edip mezbûre Meryem tereke-i müteveffâ-yı mezbûrdan benim hisseme isâbet ve intikāl eden on dört bin akçemi mezbûre Meryem vesâyeti hasebiyle ahz u kabz ettikden sonra bi gayrı hakkın mesârifine sarf etmekle meblağ-ı mezbûru mezbûre Meryem’den taleb ve da‘vâ eylediğimde ol dahi inkâr etmekle beynimizde münâza‘ât-ı kesîre vâki‘ olmuşidi el-hâletü hâzihî muslihûn tavassut edip mezbûre Meryem ile beynimizde yüz altı esedî guruş üzerine inşâ-i akd-i sulh eylediklerinden ben dahi sulh-i mezbûru kabûl ve bedel-i sulh olan meblağ-ı mezbûr yüz altı esedî guruşu mezbûre Meryem yedinden tamâmen ahz u kabz edip husûs-ı mezbûra müte‘allika da‘vâdan merkūme Meryem’in zimmetini ibrâ-i âmm-ı kātı‘ü’n-nizâ‘ [ile] ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min şehri Recebi’l-mürecceb li sene seb‘a ve seb‘în ve elf. Şuhûdü’l-hâl: Es-Seyyid Mehmed Çelebi, diğer es-Seyyid Mehmed Çelebi el-Mübâşir, Ahmed Ağa Kethüdâ-yı hazret-i nakībü’l-eşref, Mehmed Efendi el-Cündî.