Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 202 Hüküm no: 179 Orijinal metin no: [27a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sinob v. Kirko üzerine Kirko v. Apostol’ün vasî tayin olunması Fi’l-asl vilâyet-i Rumeli’nde Livâ-i Avlonya’da Ergirikasrı kazâsına tâbi‘ Trekova nâm [karye]den olup hâlâ medîne-i Bursa’da Balıkpazarı kurbunda müsâfiren sâkin iken bundan akdem mürd olan Kirko v. Sava nâm hâlikin verâseti zevce-i metrûkesi Korişe bt. Dor nâm nasrâniyye ile sulbî kebîr oğlu Sava ve sagīr oğlu Sinob’a münhasıra olduğu lede’ş-şer‘i’l-mutahhar zâhir ve mütehakkik oldukdan sonra sagīr-i merkūm Sinob’a babası hâlik-i mezbûrdan bi’l-irsi’ş-şer‘î intikāl edip mahmiye-i İstanbul’da medîne-i Hazret-i Ebâ Eyyûb el-Ensârî’de ve medîne-i mezkûre Bursa’da zimem-i nâsda ve gayrıda olan emvâlini taleb ve da‘vâ ve ahz ve kabz ve hıfz için bir vasî nasb olunmak elzem ve ehem olmağın yine karye-i mezbûre sükkânından râfi‘ü’r-rakīm Kirko v. Apostol nâm zimmî sagīr-i merkūmun akrabâsından olup vesâyet-i mezbûresine her vechile mahal ve müstahık olduğunu yine karye-i merkūme ve karye-i mezbûreye karîb kurâ ahâlîlerinden zeyl-i vesîkada muharrerü’l-esâmî kimesneler ihbâr etmeğin hâkim-i muvakki‘-i sadr-ı kitâb tûbâ-leh ve hüsnü me’âb dahi merkūm Kirko’yı sagīr-i mezbûrun vech-i muharrer üzre emvâlini hıfz için vasî nasb ve ta‘yîn eyledikde ol dahi vesâyet-i mezbûreyi kabûl ve merâsimini edâya müte‘ahhid olmağın mâ cerâ ketb olundu. Fî 29 Ramazân sene [10]90. Şuhûdü’l-hâl: Üveys b. Zîver, Mehmed b. Sefer, Hasan Çavuş b. Sinan, Mehmed Efendi, Hasan b. Abdullah.