Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 202 Hüküm no: 180 Orijinal metin no: [27a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kirkor v. Ovanes’in Yasef v. Salamon’a olan borcunu taksitle ödemesi Fi’l-asl mahrûse-i Galata’da Bereketzâde mahallesi sükkânından olup hâlâ vilâyet-i Kırım’da vâki‘ medîne-i Bahçesaray’da sâkin işbu orta boylu kara sakallı elâ gözlü Kirkor v. Ovanes nâm Ermeni meclis-i şer‘-i şerîfde Havâss-ı Aliyye kazâsına tâbi‘ kasaba-i Hasköy’de Keçeci mahallesinde sâkin işbu râfi‘ü’r-rakīm Yasef v. Salamon nâm Yahudi muvâcehesinde tâyi‘an ikrâr-ı tâm ve takrîr-i kelâm edip bin seksen dokuz senesi Cumâdelûlâ’sında merkūm Yasef’in kendi malından olmak üzre yedinden iki yüz esedî guruş istikrâz ahz ve kabz etmişidim hâlâ yine mesfûr Yasef’in malından olmak üzre kendi yedinden üç yüz elli guruş dahi istikrâz ve kabz edip cem‘an beş yüz elli esedî guruş merkūm Yasef’e zimmetimde lâzımü’l-kazâ ve vâcibü’l-edâ deynim olmuşdur lâkin meblağ-ı merkūmu def‘aten edâya iktidârım olmamağın târih-i kitâb gününden beher sene tamâmında sâkin olduğum medîne-i mezbûrede mesfûr Yasef’e yetmiş esedî guruş irsâl edip ol dahi meblağ-ı merkūm yetmiş esedî kendiye vâsıl oldukça benim imzâm ile mümzâ ve mührüm ile memhûr olup mesfûr Yasef’in yedinde olan deyn temessükümün zahrına vusûlünü ketb ve tahrîr etmek üzre merkūm Yasef ile kavl ve ta‘ahhüd ve iltizâm eyledik dedikde mezbûr Yasef dahi merkūm Kirkor’u kelimât-ı mahkiyesinde vicâhen tasdîk ve tahkīk etmeğin mâ vaka‘a bi’l-ibtigā kayd şüd. Fi’l-yevmi’s-sâmin ve’l-ışrîn min şehri Ramazâni’l-mübârek li sene tis‘în ve elf. Şuhûdü’l-hâl: Halil Ağa b. Mahmud, Abdüsselâm Efendi el-Mukayyid, Hüseyin Çelebi b. Ali, Ahmed Çelebi b. Mehmed el-Müezzin, Mehmed Çelebi b. el-Hâc Osman, Mehmed Çelebi b. Mustafa, Mehmed Çelebi b. Ahmed, Mehmed Çelebi ve Şaban Çelebi ibney Mustafa ve gayruhüm.