Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 203 Hüküm no: 181 Orijinal metin no: [27b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Bey b. Ali’nin alacağının Papa Asvador v. Avasop tarafından ödenmesi Mahmiye-i İstanbul’da Alacahamam kurbunda vâki‘ Çelebi Sultan Mehmed mahallesi sükkânından işbu râfi‘ü’l-kitâb Hasan Bey b. Ali meclis-i şer‘-i hatîr-i lâzımü’t-tevkīrde Papa Asvador v. Avasop nâm Ermeni muvâcehesinde üzerine da‘vâ ve takrîr-i kelâm edip mezbûr Papa Asvador zimmetinde cihet-i karz-ı şer‘îden iki yüz otuz beş esedî guruş hakkım olup bundan akdem meblağ-ı mezbûru Papa Asvador[’dan] da‘vâ ve taleb sadedinde iken beynimizde münâza‘ât-ı kesîre ve muhâsamât-ı ekîde vâkı‘a olmağla beynimize müslimûn-ı muslihûn tavassut edip mezbûr Papa Asvador ile meblağ-ı merkūm da‘vâsından beni kırk esedî guruş üzerine inşâ-i akd-i sulh eylelediklerinde ben dahi sulh-ı mezbûru kabûlümden sonra bedel-i sulh olan meblağ-ı mezbûr kırk esedî guruşun iki buçuk esedî guruşu mukābelesinde bana bir yaldız altını def‘ ve teslîm etmişiken hâlâ bedel-i mezkûrdan bâkī kalan otuz yedi buçuk guruşu bana vermede ta‘allül eder suâl olunup takrîri tahrîr ve bedel-i bâkī otuz yedi buçuk guruşun alıverilmesi matlûbumdur dedikde gıbbe’s-suâl mezbûr Papa Asvador cevâbında vech-i muharrer-i meşrûh üzre sulh-ı mezbûru ikrâr lâkin bedel-i bâkī-i def‘aten edâya iktidârım yokdur deyû mezbûr Hasan Bey’den te’cîl taleb eylediğinde mezbûr Hasan Bey te’cîl etmemeğin bedel-i bâkī meblağ-ı mezbûr otuz yedi buçuk esedî guruşu alâ mûcebi ikrârihî mezbûr Hasan Bey’e edâ ve teslîme mesfûr Asvador’a tenbîh birle mâ vaka‘a bi’t-taleb kayd şüd. Fi’l-yevmi’s-sâmin ve’l-ışrîn min şehri Ramazâni’l-mübârek li sene tis‘în ve elf. Şuhûdü’l-hâl: Abdullah Çavuş b. Mehmed Mübâşir, Hasan b. Abdullah, Ali b. Abdullah, Mehmed b. Eyüb.