Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 204 Hüküm no: 182 Orijinal metin no: [27b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer Beşe b. Abdullah’ın kölesi Dilâver’i anlaşmalı (mükâtebe) olarak azat etmesi Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-’de Kiremitçi Süleyman Çelebi mahallesinde sâkin Ömer Beşe b. Abdullah nâm kimesne meclis-i şer‘-i hatîr-i lâzımü’t-tevkīrde kendiye rıkkını mu‘terif orta boylu açık kaşlı kara gözlü mültehî Gürciyyü’l-asl râfi‘ü’l-vesîka Dilâver b. Abdullah nâm abd-i memlûkü muvâcehesinde ikrâr-ı tâm ve takrîr-i kelâm edip mevsûf-ı mezbûr Dilâver târih-i kitâbdan bir sene tamâmına değin bana hizmet edip sene-i mezkûre tamâmında cemî‘ malımdan âzâd olmak üzre merkūm Dilâver’i hizmet-i kitâbete kat‘ eyledim ba‘de’l-yevm mevsûf-ı mezbûr Dilâver bilâ-ibâk ve lâ-hıyâne sene-i mezbûre tamâmına değin bana hizmet ettikde sâir ahrâr-ı asliyyîn zümresine ilhâk ve idrâc olup üzerinde hakk-ı velâdan gayrı hakkım [kalmadı] dedikde gıbbe’t-tasdîk ve’l-kabûl mâ cerâ bi’l-ibtigā kayd şüd. Fi’l-yevmi’r-râbi‘ min Şevvâli’l-mükerrem li sene tis‘în ve elf. Şuhûdü’l-hâl: Fahrü’l-akrân Haseki Mustafa Ağa, Kaytas b. Abdullah, Halil b. Hasan, Sinan b. Abdullah, Mehmed b. Eyüb.