Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 204 Hüküm no: 183 Orijinal metin no: [27b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Abdullah’ın ortaklarındaki alacağını tahsil etmek üzere vârislerince vekil tayin olunması Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-’de Koca Kasım Paşa mahallesinde sâkin iken bundan akdem vefât eden taşçı Ahmed b. Abdullah’ın verâseti zevce-i metrûkesi Sâliha bt. Mustafa ile sulbiye kızları Fâtıma ve Hanife ve Râbia nâm sagīrlere münhasıra oldukdan sonra sagīrât-ı merkūmâtın tesviye-i umûru için kıbel-i şer‘den mansûbe vasîleri ve vâlideleri olan mezbûre Sâliha meclis-i şer‘-i şerîfde işbu râfi‘ü’l-kitâb İbrahim Beşe b. Abdullah mahzarında bi’l-vesâye takrîr-i kelâm edip müteveffâ-yı mezbûrun gāibân ani’l-meclis Hasan ve Osman nâm şerîklerinin mâl-ı şirketden yedlerinde olan maldan müteveffâ-yı mezbûra âid olan hisse-i mu‘ayyenesini da‘vâ ve taleb ve ahz ve kabza ve sâir zimem-i nâsda olan hukūkunu dahi da‘vâ ve taleb ve ahz ve kabz ve kendiye îsâle ve lede’l-hükkâmi’l-kirâm mürâfa‘a ve muhâsamaya ve kabz ve îsâl mütevakkıf olduğu umûrun küllîsine tarafımdan mezbûr İbrahim Beşe’yi vekîl ve nâib-i menâb nasb ve ta‘yîn eyledim dedikde ol dahi vekâlet-i mezbûreyi kabûl ve hizmet-i lâzımesini edâya ta‘ahhüd ve iltizâm etmeğin mâ hüve’l-vâki‘ bi’t-taleb kayd şüd. Fi’l-yevmi’r-râbi‘ min Şevvâli’l-mükerrem li sene tis‘în ve elf. Şuhûdü’l-hâl: Muhtesib Ahmed Çelebi, Mehmed b. Eyüb, Mehmed b. Mahmud, Hasan b. Abdullah ve gayruhüm.