Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 207 Hüküm no: 186 Orijinal metin no: [28a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Koçu v. Dado’nun emlak ve ağaçlarının yarısını kardeşi oğlu Dado v. Duka satması Vilâyet-i Rumeli’nde Livâ-i Avlonya’da Ergirikasrı kazâsına tâbi‘ Seferyat nâm karye ahâlîsinden Koçu v. Dado nâm zimmî meclis-i şer‘-i şerîf-i enverde li ebeveyn er karındaşı oğlu işbu râfi‘ü’r-rakīm Dad[o] v. Duka nâm zimmî muvâcehesinde tâyi‘an ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk ve zabt ve tasarrufumda olup karye-i mezbûrede vâki‘ bir tarafdan Kiko v. Dado nâm zimmî mülkü ve bir tarafdan Dado v. Kiko nâm zimmî mülkü ve bir tarafdan Nika v. Dimo nâm zimmî mülkü ve bir tarafdan tarîk-i âm ile mahdûd bir fevkānî oda ve altında ahırı ve zât-ı eşcâr-ı müsmire ve gayr-ı müsmire bahçeyi müştemil menzilimin nısf-ı şâyi‘i ile yine karye-i merkūmede lede’l-ahâlî ma‘lûmü’l-hudûd bir kıt‘a mülk harman yerinin nısf-ı şâyi‘ini ve yine karye-i mezbûrede vâki‘ bir tarafı Dimo v. Dado nâm zimmî bağı ve bir tarafı tarîk-i âm ve iki tarafı dere ile mahdûd bir kıt‘a mülk bağımın nısf-ı şâyi‘ini cemî‘ hukūk ve merâfıkı ile ve yine karye-i mezbûrede ma‘lûmü’l-mevâzi‘ altı dib dut ve dokuz dib ceviz eşcârının nısf-ı şâyi‘lerini dahi merkūm Dado’ya bi safkatin vâhidetin on iki bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î bey‘ ve temlîk ol dahi ber vech-i muharrer iştirâ ve temellük ve kabûl eyleyip semeni olan meblağ-ı mezkûr on iki bin akçeyi mersûm Dado yedinden tamâmen ahz ve kabz eylediğimden sonra emlâk-i merkūmenin nısf-ı şâyi‘ilerini mahallinde zabt ve tasarrufa merkūm Dado’yu taslît eyledim dedikde gıbbe’t-tasdîki’ş-şer‘î mâ cerâ bi’l-ibtigā kayd şüd. Fi’l-yevmi’l-âşir min Şevvâli’l-mükerrem li sene tis‘în ve elf. Şuhûdü’l-hâl: Mehmed b. Eyüb, Mehmed b. Mahmud huddâm, Hüseyin b. Ali, Ali b. Abdullah.