Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 207 Hüküm no: 187 Orijinal metin no: [28a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsterimo v. Yorgi’nin samanlığını Yani v. Yorgi’ye satması Vilâyet-i Rumeli’nde Çatalca kazâsına tâbi‘ Nuhur Kostrova nâm karye ahâlîsinden İsteryo v. Yorgi nâm zimmî meclis-i şer‘-i şerîfde işbu râfi‘ü’r-rakīm Yani v. Yorgi nâm zimmî muvâcehesinde ikrâr ve takrîr-i kelâm edip silk-i mülk-i sahîhimde münselik olup karye-i mezbûrede vâki‘ bir tarafdan Kostantin nâm zimmî mülkü ve bir tarafı Niko nâm zimmî mülkü ve bir tarafı tarîk-i âm ile mahdûd bir mikdâr bostan yerini müştemil mülk samanlığımı cemî‘ tevâbi‘ ve levâhıkıyla mezbûre Yani’ye üç bin altı yüz fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î bey‘ ve temlîk ol dahi minvâl-i muharrer üzre iştirâ ve temellük ve kabûl eyledikden sonra semeni olan meblağ-ı mersûm üç bin altı yüz akçeyi yedinden bi’t-tamâm ve’l-kemâl ahz ve kabz eyledim ba‘de’l-yevm zikr olunan emlâkde vechen mine’l-vücûh alâka ve medhalim yokdur, mezbûr Yani’nin mülk-i müşterâsı olmuşdur keyfe mâ yeşâ’ mahallinde zabt ve tasarrufa mezbûr Yani’yi taslît eyledim dedikde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’s-sânî aşer min Şevvâli’l-mükerrem li sene tis‘în ve elf. Şuhûdü’l-hâl: Mehmed b. Eyüb, es-sâbıkūn.