Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 349 Hüküm no: 400 Orijinal metin no: [55a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ekmekçi Zaharya’nın ölen babasının parasına el koyan Mağdavak v. Kazar’da alacağı olduğu Ekmekçi tâifesinden Zaharya v. Toros nâm zimmî dîvân-ı ma‘delet-ünvân-ı sultânîde akd olunan meclis-i şer‘-i âlîde tâife-i mezbûreden Mağdavak v. Kazar nâm zimmî muvâcehesinde üzerine da‘vâ ve takrîr-i kelâm edip bundan akdem babam ve mûrisim mezbûr Toros mahrûse-i Edirne’de ekmekçilik ederken hâlik oldukda yirmi kıt‘a esedî nakid esedî guruş ile sâir yanında mevcûde olan muhallefâtı semenlerinden otuz kıt‘a esedî guruş cem‘an elli kıt‘a esedî guruşu mezbûr Mağdavak fuzûlen ahz [ve] kabz eylemişdir, suâl olunup meblağ-ı mezkûr elli kıt‘a esedî guruşun mezbûr Mağdavak’dan alıverilmesi matlûbumdur dedikde, gıbbe’s-suâl mezbûr Mağdavak cevâbında fi’l-hakīka mezbûr Toros mahrûse-i mezbûrede hâlik oldukda vech-i muharrer üzre elli kıt‘a nakid esedî guruşu ile sâir yanında mevcûd olan muhallefâtı semenlerinden otuz kıt‘a esedî guruş cem‘an elli kıt‘a esedî guruşu ahz u kabz eylemiş idim velâkin müdde‘î-i mezbûr Zaharya’ya îsâl ve teslîm eyle deyû işbu hâzır bi’l-meclis Kogaz v. Biki nâm zimmîye vermişimdir deyicek, mezbûr Kogaz istintâk olundukda inkâr eylemeğin alâ mûcebi ikrârihî meblağ-ı mezkûr elli kıt‘a esedî guruşu müdde‘î-i mezbûr Zaharya’ya [55b] teslîme merkūm Mağdavak’a ba‘de’t-tenbîh mâ hüve’l-vâki‘ bi’l-ibtigā ketb ve imlâ olundu. Fi’l-yevmi’l-âşir min Recebi’l-mürecceb li sene seb‘a ve seb‘în ve elf. Şuhûdü’l-hâl: Emîrü’l-ümerâ’i’l-kirâm kebîrü’l-küberâi’l-fihâm Mehmed Paşa Kāimmakām-ı defterdâr-ı şıkk-ı evvel, umdetü’l-emâcid ve’l-ekârim Çavuşbaşı İsmail Ağa, fahrü’l-akrân ve’l-eşbâh Şaban Ağa b. Süleyman Ser-muhzırân, umdetü’l-emâsil ve’l-a‘yân Eyüb Ağa Kethüdâ-yı hazret-i efendi, umdetü’l-eşbâh Hüseyin Beşe b. Abdullah Çukadâr ve gayruhüm.