Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 208 Hüküm no: 189 Orijinal metin no: [28b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ali’nin çocukları Ali ve Ümmühani’ye nafaka ödemesi Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Düğmecibaşı mahallesi sâkinelerinden işbu râfi‘ü’l-kitâb İsmihân bt. Bayram nâm hâtun meclis-i şer‘-i şerîfde takrîr-i kelâm ve bast-ı merâm edip zevc-i mutallıkım hâzır bi’l-meclis Mehmed b. Ali’nin firâşından [hâsıl ve benden] mütevellide hâlâ bi hakki’l-hidâne hucr ve terbiyemde olan Ali ve Ümmühâni nâm sagīrler için babası mezbûr Mehmed üzerine kadr-i kifâye nafaka ve kisve-bahâ takdîr olunmak matlûbumdur dedikde hâkim-i muvakki‘-i sadr-ı kitâb tûbâ-leh ve hüsnü me’âb hazretleri dahi sagīrân-ı mezbûrânın nafaka ve kisve-bahâları için babaları mezbûr üzerine târih-i kitâbdan her biri için yevmî üçer akçe farz ve takdîr edip meblağ-ı mefrûz-ı mezkûru harc ve sarfa ve lede’l-hâce istidâneye ve vakt-i zaferde mezbûr Mehmed üzerine rücû‘a izin birle mâ vaka‘a bi’t-taleb kayd şüd. Fi’l-yevmi’l-hâmis aşer min Şevvâli’l-mükerrem li sene tis‘în ve elf. Şuhûdü’l-hâl: Ebûbekir b. Mehmed, İbrahim b. Abdullah, Ali b. Abdullah, Halil Çelebi çizmeci, Mehmed Beşe b. Abdullah, Hasan b. Ö[mer]