Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 209 Hüküm no: 190 Orijinal metin no: [28b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühani bt. Mehmed’in mehir ve nafaka hususunda eski kocası İbrahim b. Mehmed ile sulh olması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Takyecibaşı mahallesi sâkinelerinden Ümmühâni bt. Mehmed nâm hâtun tarafından husûs-ı âti’l-beyânı ikrâra vekîl olup hasm-ı câhid mahzarında mezbûrenin zâtını ma‘rifet-i şer‘iyye ile ârifân olan Mustafa Çelebi b. Elvan ve Hasan Beşe b. Abdullah nâm kimesneler şehâdetleri ile şer‘an vekâleti sâbite olan Receb Efendi b. Yusuf meclis-i şer‘-i şerîfde müvekkile-i mezbûrenin zevc-i mutallıkı işbu râfi‘ü’l-kitâb İbrahim b. Mehmed nâm kimesne mahzarında bi’l-vekâle ikrâr-ı tâm ve takrîr-i kelâm edip mezbûr İbrahim müvekkile-i mezbûre Ümmühâni’nin bundan akdem zevci olup târih-i kitâbdan altı sene mukaddem müvekkile-i merkūmeyi talâk-ı selâse ile tatlîk etmekle zimmetinde mütekarrir ve ma‘kūdun-aleyh olan dört bin akçe mehr-i müeccel hakkı kalmışidi hâlâ müvekkile-i merkūme Ümmühâni meblağ-ı mezkûru mezbûr İbrahim’den taleb ve da‘vâ eylediğinde ol dahi meblağ-ı mezkûru mukaddemâ edâ etmişidim deyû cevâb vermeğin beynlerinde münâza‘ât-ı kesîre ve muhâsamât-ı ekîde vâki‘ olmuşdu el-hâletü hâzihî beynlerine muslihûn-ı müslimûn tavassut edip meblağ-ı mezkûr da‘vâsından müvekkile-i merkūmeyi mezbûr İbrahim ile on esedî guruş üzerine inşâ-i akd-i sulh eylelediklerinde ol dahi sulh-ı mezbûru kabûl ve bedel-i sulh olan meblağ-ı mezbûru merkūm İbrahim yedinden tamâmen ahz ve kabz edip zimmetini meblağ-ı mezkûra müte‘allika âmme-i da‘vâda ibrâ-i âm ile ibrâ ve iskāt eyledim dedi dedikde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’l-hâmis aşer min Şevvâli’l-mükerrem sene [1090] Şuhûdü’l-hâl: Hasan Efendi el-İmâm, Nasuh Halîfe b. Abdüsselâm el-Müezzin, Yusuf Dede b. Ali, Ahmed Beşe b. Abdullah, Süleyman b. Oruc, İbrahim b. Ali.