.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 210
Hüküm no: 191
Orijinal metin no: [28b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


İsmihan bt. Bayram ile Mehmed b. Abdullah’ın boşanması

Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Düğmecibaşı mahallesi sâkinelerinden İsmihân bt. Bayram nâm hâtun tarafından hul‘ ve ibrâ-i âti’z-zikre vekîl olup hasm-ı câhid mahzarında mezbûrenin zâtını ma‘rifet-i şer‘iyye ile ârifân olan Ahmed Çelebi b. İbrahim ve el-Hâc Ebûbekir b. Sinan nâm kimesneler şehâdetleri ile şer‘an vekâleti sâbite olan Mehmed b. Abdullah meclis-i şer‘-i şerîfde müvekkile-i mezbûrenin zevci işbu râfi‘ü’l-kitâb Mehmed b. Ali nâm kimesne mahzarında bi’l-vekâle ikrâr-ı tâm ve takrîr-i kelâm edip müvekkile-i merkūme İsmihân mezbûr Mehmed’in zevcesi olup lâkin beynlerinden hüsn-i mu‘âşeretleri olmamağla zimmetinde mütekarrir ve ma‘kūdun-aleyh olan beş bin aç yüz akçe mehr-i müeccel hakkı ile nafaka-i iddet-i mu‘ayyenesi üzerlerine ve me’ûnet-i süknâsı dahi kendi üzerine olmak üzre vekâlet-i mahkiyem hasebiyle merkūm Mehmed ile muhâla‘a-i sahîha-i şer‘iyye ile hul‘ olup ol dahi hul‘-ı mezkûru ba‘de’l-kabûl hukūk-ı zevciyyete ve mehr-i müecceline müte‘allika âmme-i da‘vâdan mezbûr Mehmed’in zimmetini ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’r-râbi‘ aşer min Şevvâli’l-mükerrem li sene tis‘în ve elf.


Şuhûdü’l-hâl: Ebûbekir b. Mehmed, İbrahim b. Abdullah, Ali b. Abdullah, Halil Çelebi Çizmeci, Mehmed b. Eyüb.