Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 211 Hüküm no: 193 Orijinal metin no: [28b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saime bt. Ali’nin menzilini Hüseyin ile karısı Emine bt. Mustafa’ya satması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Davud Ağa mahallesi sâkinelerinden olup yine mahalle-i mezbûre sükkânından Ebûbekir b. Mustafa ve Hasan b. Sefer ta‘rîfleriyle mu‘arrefe olan Sâime bt. Ali nâm hâtun meclis-i şer‘-i şerîfde işbu râfi‘ayi’l-kitâb kendi tarafından husûs-ı âti’l-beyâna asîl ve zevcesi Emine bt. Mustafa nâm hâtun tarafından dahi vekîl-i sâbitü’l-vekâlesi olan Hüseyin b. ( ) nâm kimesne mahzarında bi tav‘ihâ ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ üç tarafdan yine benim mülküm ve taraf-ı râbi‘i tarîk-i âm ile mahdûd bir tahtânî oda ve bir mikdâr havluyu müştemil menzilimi cemî‘ tevâbi‘ ve levâhıkı ile mezbûrân Hüseyin ve Emine’ye ale’l-iştirâki’s-seviy mutasarrıf olmak üzre dört bin sekiz yüz fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm anlar dahi ber vech-i muharrer iştirâ ve tesellüm ve kabûl eylediklerinden sonra semeni olan meblağ-ı mezkûr dört bin sekiz yüz akçeyi mezbûrân Emine ve Hüseyin yedlerinden tamâmen ahz ve kabz eyledim ba‘de’l-yevm menzil-i mahdûd-ı mezkûrda vechen mine’l-vücûh alâka ve medhalim kalmadı merkūmân Hüseyin ve Emine keyfe mâ yeşâ’ân ve yahtârân mutasarrıfân olsunlar dedikde gıbbe’t-tasdîki’ş-şer‘î mâ vaka‘a bi’l-ibtigā ketb olundu. Fi’l-yevmi’l-hâmis aşer min Şevvâli’l-mükerrem li sene tis‘în ve elf. Şuhûdü’l-hâl: Hasan Efendi el-İmâm, Nasuh Halîfe el-Müezzin, Ömer Efendi b. Ahmed Efendi, Musli Ağa Ser-tüfekçiyân, İbrahim Ağa Pazarbaşı, el-Hâc Süleyman b. Abdullah, Receb Beşe b. Mustafa, Ahmed Beşe b. Hüseyin, Mehmed b. Eyüb.