Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 211 Hüküm no: 194 Orijinal metin no: [29a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Ağa b. Mehmed’in vârislerine alacak iddiasını ispat için mühlet verilmesi Mahmiye-i İstanbul’da Ağa hamamı kurbunda Hâtuniye mahallesi sükkânından iken bundan akdem vefât eden Mustafa Ağa b. Mehmed’in verâseti li ebeveyn er karındaşıları Osman ve Şaban ve Sefer’e münhasıra olup kable’l-kısme merkūm Sefer dahi vefât edip verâseti zevce-i metrûkesi Fâtıma bt. Abdullah nâm hâtun ile sulbî sagīr oğlu Ahmed’e ve sulbiye sagīre kızı Sâliha’ya münhasıra olduğu şer‘an zâhir ve mütehakkik oldukdan sonra merkūm Osman asâleten ve sagīrân-ı mezbûrânın kıbel-i şer‘den mansûbe vasîleri olan vâlideleri merkūme Fâtıma ile mezbûr Şaban taraflarından husûs-ı câ’îye vekâlet iddi‘â etmek ile vekâleten meclis-i şer‘-i şerîfde Havâss-ı Aliyye kazâsına tâbi‘ Küçükköy demekle ma‘rûf karyede sâkin iken bundan akdem mürd olan Panayot v. Dimo nâm hâlikin verâseti zevce-i metrûkesi Zafira bt. Aleksi nâm nasrâniyye ile evlâd-ı sulbiyesi Yanaki muvâcehesinde üzerine da‘vâ ve takrîr-i kelâm edip mûrisimiz müteveffâ-yı mezbûr Mustafa Ağa hayâtında bin yetmiş dokuz senesi Ramazân-ı şerîfi’nde mahmiye-i mezkûrede Samatya kurbunda Sancakdâr mahallesinde sâkin koyun emîni Ebûbekir Ağa nâm kimesnenin menzilinde hâlik-i merkūm Panayot ile gāibûn ani’l-meclis Kostantin ve Dimitraki ve İsteryo ve Kika ve diğer Kika ve Hristo ve Tatar Yorgi ve Hristodolo ve Hürmüz nâm zimmîlere iki bin kıt‘a esedî guruşluk semen ikrâz ve teslîm anlar dahi ale’l-iştirâki’s-seviy iktirâz ve tesellüm ve her biri âharın zimmetine lâzım gelen meblağa kefîl olup kable’l-ahz vefât etmek ile hâlâ meblağ-ı mezkûrdan hâlik-i merkūmun hissesine lâzım gelen iki yüz guruş merkūm Yanaki babası hâlik-i merkūmun terekesine vaz‘-ı yed etmeğin hâlik-i mezbûrun tereke-i vâfiyesinden edâ etmek üzre merkūm Yanaki’den asâleten ve vekâleten taleb ederim suâl olunsun dedikde gıbbe’s-suâl merkūm Yanaki cevâbında babası hâlik-i merkūmun terekesine vaz‘-ı yedini ve deyn-i mezkûru vekâlet-i mezkûreyi bi’l-külliye inkâr etmeğin müdde‘î-i mezbûr Osman’dan müdde‘âsını mübeyyine beyyine taleb olundukda müdde‘î-i mezbûr Osman ityân-ı beyyine [için] kıbel-i şer‘den mehil taleb etmek ile müdde‘î-i merkūme mirâren mehl-i şer‘î verilip ityân-ı beyyineye kādir olmayıp yine istimhâl etmekle müdde‘î-i mezbûr Osman’a mehil verilip vâki‘ü’l-hâl hıfzan li’l-makāl gıbbe’t-taleb ketb olundu. Fi’l-yevmi’s-sâdis aşer min Şevvâli’l-mükerrem li sene tis‘în ve elf. Şuhûdü’l-hâl: Mehmed b. Eyüb, Mehmed b. Mahmud, Ali b. Abdullah, Hüseyin b. Ali, Hasan b. Abdullah.