Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 212 Hüküm no: 195 Orijinal metin no: [29a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Dimitri’nin vârislerinin alacak davasının reddi Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de vâki‘ merhûm Âsım Ahmed Çelebi vakfı’na berât-ı âlîşân ile bi’l-fi‘l mütevellî olan işbu râfi‘ü’l-kitâb Mehmed Çelebi b. Mustafa nâm kimesne mahfil-i kazâda medîne-i mezbûre tevâbi‘inden Avasya nâm karyede sâkin iken bundan akdem mürd olan Yani v. Dimitri nâm hâlikin verâseti zevce-i metrûkesi Kaloda bt. İstoyan nâm nasrâniyye ile sulbiye kebîre kızı Kokona nâm nasrâniyyeye münhasıra oldukdan sonra merkūmetân Kaloda ve Kokona muvâcehelerinde bi’t-tevliyye üzerlerine da‘vâ ve takrîr-i kelâm edip hâlik-i merkūmun hayâtında zimmetinde asl-ı mâl-ı vakf-ı mezbûrdan otuz yedi buçuk kıt‘a esedî guruş olup mukābelesinde karye-i merkūmede vâki‘ bir [taraf]dan Tanaş v. Dimo mülkü ve bir tarafı Aleksi v. Yorgi mülkü ve bir tarafı Apostol v. Yorgi mülkü ve taraf-ı râbi‘i tarîk-i âm ile mahdûd mülk menzilini taraf-ı vakfa bi tarîki’l-istiğlâl rehin vaz‘ ve teslîm etmişidi hâlâ hâlik-i mezbûrun menzil-i mezkûrdan mâ‘adâ ism-i mâl ıtlâk olunur bir şeyi olmamağla merkūmetân Kaloda ve Kokona menzil-i mezbûru vakıf için bana otuz yedi buçuk esedî guruşa bey‘ ve teslîm edip ben dahi vakıf için iştirâ ve tesellüm ettiğimden sonra semeni olan meblağ-ı merkūm otuz yedi buçuk esedî guruşu hâlik-i mezbûrun vakfa olan otuz yedi buçuk esedî guruş deyni mukābelesinde takās edip anlar dahi mukāssa ve kabûl eylediklerinden sonra ben dahi menzil-i merkūmu [sûk-ı] sultânîde üç ay mikdârı ba‘de’l-müzâyede ve inkıtâ‘i’r-rağbe hâzır bi’l-meclis İstoyan v. Yuvan nâm zimmîye semen-i ma‘lûme bey‘ murâd ettiğimde, merkūmetân Kaloda ve Kokona beni bey‘ etmekden men‘ ederler suâl olunup takrîrleri tahrîr ve benim bey‘ime mâni‘ olmamak üzre mersûmetâna tenbîh olunmak matlûbumdur dedikde gıbbe’s-suâl mezbûretân Kaloda ve Kokona cevâblarında mûrisleri hâlik-i merkūmun ber vech-i muharrer vakf-ı mezkûra deyni olup ve menzil-i merkūmdan mâ‘adâ ism-i mâl ıtlâk olunur bir şeyi olmamağla menzil-i mezkûru vakıf için mütevellî-i mesfûra otuz yedi buçuk esedî guruşa bey‘ ve teslîm ve semeni mûrisleri hâlik-i merkūmun vakfa olan otuz yedi buçuk esedî guruş deyni mukābelesinde takās eylediklerini her biri bi tav‘ihâ ikrâr ve i‘tirâf etmeğin merkūmetân Kaloda ve Kokona’yı mütevellî-i mesfûra bî-vech mu‘ârazadan men‘ birle mâ cerâ mütevellî-i mezbûr talebiyle kayd şüd. Fi’l-yevmi’s-sâdis aşer min Şevvâli’l-mükerrem li sene tis‘în ve elf. Şuhûdü’l-hâl: İbrahim Efendi b. Hasan, Mehmed Çelebi b. Veli, Mustafa Çelebi b. İsmail, Mehmed b. Eyüb.