Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 213 Hüküm no: 196 Orijinal metin no: [29a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âsım Ahmed Çelebi Vakfı’na ait menzilin İstoyan v. Yuvan’a satılması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de vâki‘ merhûm Âsım Ahmed Çelebi vakfı’na berât-ı âlîşân ile bi’l-fi‘l mütevellî olan Mehmed Çelebi b. Mustafa nâm kimesne meclis-i şer‘-i şerîfde işbu râfi‘ü’r-rakīm İstoyan v. Yuvan nâm zimmî muvâcehesinde bi’t-tevliyye ikrâr-ı tâm ve takrîr-i kelâm edip bundan akdem vakf-ı mezkûr malıyla iştirâ olunup medîne-i mezbûre müzâfâtından Avasya nâm karyede vâki‘ bir tarafdan Tanaş v. Dimo nâm zimmî mülkü ve bir tarafdan Aleksi v. Yorgi nâm zimmî mülkü ve bir tarafdan Apostol v. Yorgi nâm zimmî mülkü ve bir tarafdan tarîk-i âm ile mahdûd menzil bey‘ olunup semeni istirbâh olunmak cânib-i vakfa her vechile enfa‘ ve evlâ olmağla sûk-ı sultânîde üç ay mikdârı nidâ ve müzâyede olunup rağabât-ı nâs bi’l-külliye münkatı‘ oldukdan sonra merkūm İstoyan üzerinde semen-i misli olan on sekiz kıt‘a esedî guruşda hakk-ı karâr ile karâr edip ziyâde ile tâlib-i âhara zuhûr etmemeğin menzil-i mahdûd-ı mezkûru tevliyyetim hasebiyle mersûm İstoyan’a meblağ-ı mezkûr on sekiz guruşa bey‘-i kat‘î ile bey‘ ve teslîm edip ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı merkūm on sekiz guruşu mersûm İstoyan yedinden tamâmen ahz ve kabz eyledim ba‘de’l-yevm menzil-i mezkûr merkūm İstoyan’ın mülk-i müşterâsı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin aşer min Şevvâli’l-mükerrem li sene tis‘în ve elf. Şuhûdü’l-hâl: İbrahim Halîfe b. Hasan, Mehmed Çelebi b. Veli, Mustafa Çelebi b. İsmail, Mehmed b. Eyüb. Ali b. Abdullah.