Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 214 Hüküm no: 197 Orijinal metin no: [29b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Abdullah’ın evini Mehmed b. Resul’e satması Mahrûse-i Galata müzâfâtından İstinye nâhiyesinde tâbi‘ Uskumru nâm karye sükkânından Mehmed Çelebi b. Abdullah meclis-i şer‘-i şerîfde işbu râfi‘ü’l-kitâb Mehmed b. Resul nâm kimesne mahzarında ikrâr ve i‘tirâf edip silk-i mülk-i sahîhimde münselik olup karye-i mezbûrede vâki‘ iki tarafı Mehmed Bey b. Davud mülkü ve iki tarafı tarîk-i âm ile mahdûd bir bâb tahtânî odayı müştemil mülk menzilimi cemî‘ tevâbi‘i ile bin fıddî râyic fi’l-vakt akçe ile adedi nâ-ma‘lûm bir kabza fülûsa mezbûr Mehmed’e bey‘ ve teslîm edip ol dahi minvâl-i muharrer üzre iştirâ ve tesellüm ve kabûl ve kabz eyledikden sonra semeni olan meblağ-ı mezbûr bin akçe ile bir kabza fülûsu yedinden bi’t-tamâm ahz ve kabz edip fülûsu izâ‘at eyledim ba‘de’l-yevm menzil-i mahdûd-ı mezkûrda alâka ve medhalim yokdur, mezbûr Mehmed’in mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’t-tâsi‘ ve’l-ışrîn min Şevvâli’l-mükerrem li sene tis‘în ve elf. Şuhûdü’l-hâl: Mehmed Çelebi b. Veli, Eyüb Çelebi b. Mustafa, Hasan b. Abdullah.