Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 214 Hüküm no: 198 Orijinal metin no: [29b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Mustafa’nın ev satışından Mehmed Çelebi b. Hasan’a olan borcunu ödemesi Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Kasım Paşa mahallesinde sâkin işbu râfi‘ü’l-kitâb Mehmed Çelebi b. Hasan mahfil-i kazâda medîne-i mezbûrede Çavuş Kasım mahallesi sükkânından Mehmed Beşe b. Mustafa nâm kimesne mahzarında üzerine da‘vâ ve takrîr-i kelâm edip mezbûr Mehmed Beşe mezkûr Çavuş Kasım mahallesinde vâki‘ bir tarafı imâma meşrûta menzil ve iki tarafı Ali Çelebi veresesi mülkleri ve bir tarafı tarîk ile mahdûd mülk menzilini bin seksen dokuz senesi şehri Recebü’l-müreccebinde bana iki yüz kıt‘a esedî guruşa bi tarîki’l-istiğlâl bey‘ ve teslîm ve kabz-ı semen eyledikden sonra yine târih-i mezkûrda menzil-i mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î mezbûr Mehmed Beşe’ye bir sene tamâmına değin yirmi esedî guruş ücret ile îcâr ve teslîm edip ol dahi ber vech-i muharrer istîcâr ve tesellüm ve kabûl eylediğinden sonra meblağ-ı mezkûr iki yüz guruşu bin doksan senesi şehri Recebü’l-müreccebi’nde tamâmen bana teslîm ben dahi kabz ve tesellüm etmişidim lâkin menzil-i mezkûrun ücreti olan meblağ-ı merkūm yirmi guruşdan üç guruşunu mezbûr Mehmed Beşe yedinden tamâmen ahz ve kabz edip bâkī zimmetinde on yedi esedî guruş hakkım kalmışidi hâlâ taleb eylediğimde vermekde ta‘allül eder suâl olunup edâsına tenbîh olunmak matlûbumdur dedikde gıbbe’s-suâl mezbûr Mehmed Beşe cevâbında minvâl-i muharrer-i meşrûh üzre menzil-i merkūm ücretinden müdde‘î-i mezbûr Mehmed Çelebi’ye meblağ-ı bâkī on yedi guruş zimmetimde lâzımü’l-edâ deynim vardır deyû tav‘an ikrâr etmeğin alâ mûcebi ikrârihî meblağ-ı bâkī-i mezbûr on yedi guruşu müdde‘î-i mezbûra edâya merkūm Mehmed Beşe’ye tenbîh birle mâ vaka‘a kayd şüd. Fi’l-yevmi’t-tâsi‘ aşer min Şevvâli’l-mükerrem li sene tis‘în ve elf. Şuhûdü’l-hâl: İvaz Bey b. Mahmud, Mustafa Çelebi b. Mehmed, Mehmed Çelebi b. Veli, Hasan b. Abdullah, Mehmed b. Eyüb.