Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 350 Hüküm no: 401 Orijinal metin no: [55b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saraylı Raziye bt. Abdullah’ın vakfettiği paraya el-Hâc İbrahim b. Ramazan’ın mütevelli tayin edildiği Merhûme Saraylı Râziye bt. Abdullah nâm hâtun Dârü’l-hilâfeti’l-aliyye Kostantıniyye el-mahmiyye mahallâtından Akşemseddin mahallesi mescid-i şerîfi ve ma‘bed-i latîfi meremmetine vakf-ı lâzım ile vakf eylediği yüz kıt‘a esedî guruşun ber mûceb-i şart-ı vâkıfe yevmî bir akçe vazîfe ile meşrûtiyyet üzre mütevellîsi olan Süleyman Çavuş b. Hüseyin vefât etmeğin vakf-ı mezbûra bir mütevellî nasb olunmak ehem ve elzem ve mescid-i şerîf-i mezkûrun mütevellîsi olan işbu bâ‘isü’l-kitâb el-Hâc İbrahim b. Ramazan nâm kimesne müstakīm ve dindâr olup umûr-ı tevliyyet uhdesinden gelmeğe kemâ yenbağī iktidârı olduğu zeyl-i rakīm olunan udûl-i müslimîn ihbârlarıyla lede’ş-şer‘i’l-mutahhar zâhir ve mukarrer olmağın mezbûr el-Hâc İbrahim vazîfe-i mezbûre ile nukūd-ı mevkūfe-i mezkûreye dahi kıbel-i şer‘-i mübînden mütevellî nasb ve ta‘yîn olundukda ol dahi tevliyyet-i mezbûreyi kabûl ve hizmet-i lâzımesin edâya ta‘ahhüd etmeğin mâ hüve’l-vâki‘ bi’l-ibtigā ketb ve imlâ olundu. Fi’l-yevmi’l-âşir min Recebi’l-mürecceb li sene seb‘a ve seb‘în ve elf min hicreti men lehü’l-izzü ve’ş-şeref. Şuhûdü’l-hâl: Abdurrahman Efendi b. eş-Şeyh Ahmed el-İmâm, Halil Halîfe b. Mustafa el-Müezzin, Siyavuş Halîfe b. Abdullah, İbrahim Çelebi b. Ahmed.