Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 215 Hüküm no: 199 Orijinal metin no: [29b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Abdullah b. İsa’nın Mustafa Paşa’nın Doğancılar meydanında yapdırdığı bina için sattığı çivilerin karşılığını aldığı Mahrûse-i Galata’da Yolcuoğlu mahallesi sükkânından olup mahmiye-i İstanbul’da Odunkapısı dâhilinde mismâr tâcirlerinden olan el-Hâc Abdullah b. İsa nâm kimesne meclis-i şer‘-i hatîr-i lâzımü’t-tevkīrde düstûr-ı mükerrem müşîr-i müfahham müsâhib-i şehriyârî devletlü ve sa‘âdetlü Mustafa Paşa hazretlerinin kethüdâları, iftihârü’l-emâcid ve’l-ekârim câmi‘ü’l-mehâmid ve’l-mekârim Hasan Ağa hazretleri taraflarından ikrâr-ı âti’z-zikri tasdîke vekîl-i sâbitü’l-vekâlesi olan Ali Ağa b. ( ) mahzarında tav‘an ikrâr-ı tâm ve takrîr-i kelâm edip paşa-yı müşârün-ileyh hazretlerinin medîne-i Üsküdar’da Salacak iskelesi kurbunda Doğancılar meydanına mülâsık müceddeden ihdâs ettikleri ebniye için vekîl-i mezbûr Ali Ağa yedinden adedi ve cinsi beynimizde ma‘lûm mismâr iştirâ etmişler idi el-hâletü hâzihî müvekkil-i mûmâ-ileyh Hasan Ağa hazretleri[y]le muhâsebe görüp paşa-yı müşârün-ileyh hazretleri taraflarından mukaddemâ bi’d-defe‘ât ahz ve kabz ettiğim akçeden mâ‘adâ yetmiş iki bin akçe hakkım bekāyâ zuhûr etmeğin meblağ-ı mezkûr yetmiş iki bin akçe hakkımı müvekkil-i mûmâ-ileyh Hasan Ağa yedlerinden bi’t-tamâm ve’l-kemâl ahz ve kabz edip yedlerine temessük verdim min ba‘d mismâr semeninden paşa-yı müşârün-ileyh hazretleri taraf-ı bâhirü’ş-şereflerinde ve müvekkil-i mûmâ-ileyh ile vekîl-i mezbûr yedlerinde bir akçe ve bir habbe hakkım bâkī kalmadı dedikde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’l-ışrîn min Şevvâli’l-mükerrem sene 1090. Şuhûdü’l-hâl: Ahmed Ağa Bâzirgân, Şaban Çelebi Mücellid, kasab Ali Beşe, Hasan b. Abdullah, Ali b. Abdullah ve gayruhüm.