Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 216 Hüküm no: 200 Orijinal metin no: [29b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ferhad v. Manos’un, Mustafa Paşa’nın yapdırdığı bina için sattığı keresteden alacağı kalmadığı Mahmiye-i İstanbul hısnı ebvâbından Topkapısı dâhilinde Bayezid Ağa mahallesi sükkânından olup Odunkapısı kurbunda keresteci Ferhad v. Manos nâm zimmî meclis-i şer‘-i şerîfde düstûr-ı mükerrem müşîr-i müfahham vezîr-i sânî müsâhib-i şehriyârî devletlü sa‘âdetlü Mustafa Paşa hazretlerinin kethüdâları iftihârü’l-emâcid ve’l-ekârim câmi‘ü’l-mehâmid ve’l-mekârim Hasan Ağa hazretleri taraflarından ikrâr-ı âti’z-zikri tasdîke vekîl-i sâbitü’l-vekâleleri olan Ali Ağa b. ( ) mahzarında tav‘an ikrâr-ı tâm ve takrîr-i kelâm edip paşa-yı müşârün-ileyh hazretlerinin medîne-i Üsküdar’da Salacak iskelesi kurbunda Doğancılar meydanına mülâsık müceddeden ihdâs ettikleri ebniye için vekîl-i mezbûr Ali Ağa yedinden adedi ve cinsi beynimizde ma‘lûm kereste iştirâ etmişleridi el-hâletü hâzihî müvekkil-i mûmâ-ileyh Hasan Ağa hazretleriyle muhâsebe görüp paşa-yı [müşâ]rün-ileyh hazretleri taraflarında mukadde[mâ] bi’d-defe‘ât ahz ve kabz ettiğim akçeden mâ‘adâ yüz kırk bin akçe hakkım bekāyâ zuhûr etmekle meblağ-ı mezkûr yüz kırk bin akçe hakkımı müvekkil-i mûmâ-ileyh Hasan Ağa yedlerinden bi’t-tamâm ve’l-kemâl ahz ve kabz edip yedlerine temessük verdim min ba‘d kereste semeninden paşa-yı müşârün-ileyh hazretleri taraf-ı bâhirü’ş-şereflerinden müvekkil-i mezbûr vekîl-i mezbûr Ali Ağa yedlerinde bir akçe ve bir habbe hakkım bâkī kalmadı dedikde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’l-ışrîn min Şevvâli’l-mükerrem li sene tis‘în ve elf. Şuhûdü’l-hâl: es-Sâbikūn.