Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 216 Hüküm no: 201 Orijinal metin no: [30a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülbâki b. Sinan’ın vârislerinin ev ve bahçeyi, Aleksi v. İstemad’a satması Havâss-ı Aliyye kazâsına tâbi‘ Karfa nâm karyede sâkin iken bundan akdem vefât eden Abdülbâkī b. Sinan nâm müteveffânın verâseti zevce-i metrûkesi Âişe bt. Abdullah nâm hâtun ile anasının li ebeveyn er karındaşı Ali b. Mustafa nâm kimesneye münhasıra olduğu şer‘an zâhir ve mütehakkik oldukdan sonra mezbûr Ali asâleten ve merkūme Âişe’nin vekîl-i müsecceli olan Hasan Bey b. Ali nâm kimesne vekâleten meclis-i şer‘-i şerîfde işbu râfi‘ü’r-rakīm Aleksi v. İstemad nâm zimmî muvâcehesinde her biri bi’l-asâle ve bi’l-vekâle ikrâr-ı tâm ve takrîr-i kelâm edip müteveffâ-yı mezbûrun muhallefâtından olup karye-i mezbûrede vâki‘ bir tarafı kilise duvarı ve bir tarafı Karakaş Kosta nâm zimmî mülkü ve bir tarafı diğer Kosta nâm zimmî mülkü ve bir tarafı tarîk-i âm ile mahdûd üç fevkānî ve bir tahtânî odaları ve havluyu müştemil menzil ile yine karye-i mezbûrede vâki‘ bir tarafı Dimitri v. Yorgo bahçesi ve üç tarafı tarîk-i âm ile mahdûd tahmînen üç dönüm bir kıt‘a mülk bağın rub‘u müvekkile-i mezbûre Âişe’ye ve selâse erbâ‘ı merkūm Ali’ye isâbet ve intikāl etmekle zikr olunan menzil ve bağı, cemî‘ tevâbi‘ ve levâhıkı ile merkūm Aleksi’ye yirmi bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr yirmi bin akçeyi merkūm Aleksi yedinden tamâmen ahz ve kabz eyledik ba‘de’l-yevm sâlifü’z-zikr menzil ve bahçe mersûm Aleksi’nin mülk-i müşterâsı olmuşdur keyfe mâ yeşâ’ mutasarrıf olsun dediklerinde gıbbe’t-tasdîki’ş-şer‘î mâ vaka‘a bi’t-taleb kayd şüd. Fi’l-yevmi’t-tâsi‘ aşer min Şevvâli’l-mükerrem li sene tis‘în ve elf. Şuhûdü’l-hâl: Mustafa Çelebi b. Musli, İbrahim Çelebi b. Abdünnebi, Hasan Çelebi b. Ömer, Abdurrahman Çelebi b. Bayram, Hasan Beşe b. Abdullah, Şaban Halîfe b. Hüseyin, Habib Beşe b. Süleyman, Mustafa Beşe b. Abdurrahman, Hasan b. Abdullah.