Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 220 Hüküm no: 207 Orijinal metin no: [30b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice b. Ahmed’in kölesi Siyavuş b. Abdullah’ı anlaşmaları gereği azat etmesi Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Sofular mahallesinde sâkine Hatice bt. Ahmed nâm hâtunun zevci ve tarafından husûs-ı âti’l-beyâna vekîl olup hasm-ı câhid mahzarında mezbûrenin zâtını ma‘rifet-i şer‘iyye [ile] ârifân olan Mustafa Çelebi b. Abdullah ve Mustafa Efendi b. Ebûbekir nâm kimesneler şehâdetleriyle şer‘an vekâleti sâbite olan İbrahim Efendi b. Resul meclis-i şer‘-i şerîfde işbu orta boylu açık kaşlı esmerü’l-levn Gürciyyü’l-asl râfi‘ü’l-kitâb Siyavuş b. Abdullah mahzarında bi’l-vekâle ikrâr-ı tâm ve takrîr-i kelâm edip müvekkile-i mezbûre Hatice kendiye rıkk-ı sâbıkını mu‘terif mevsûf-ı mezbûru bundan akdem yirmi iki bin akçe bedel ile kitâbet-i sahîha-i şer‘iyye ile kitâbete kat‘ etmişidi el-hâletü hâzihî bedel-i kitâbet-i mezkûr yirmi iki bin akçeyi mevsûf-ı mezbûr yedinden bi’t-tamâm ve’l-kemâl ahz ve kabz ettim min ba‘d mevsûf-ı mezkûr sâir ahrâr-ı asliyyîn gibi hür olup üzerinde hakk-ı velâdan gayrı hakkı kalmadı dedi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’s-sâmin ve’l-ışrîn min Şevvâli’l-mükerrem li sene tis‘în ve elf. Şuhûdü’l-hâl: Abdülganî Çelebi b. Hüseyin, Ahmed b. Abdullah, Ali b. Yusuf, Kenan b. Abdullah, Kahveci Mustafa Çelebi b. ( ) ve gayruhüm mine’l-huzzâr.