.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 221
Hüküm no: 208
Orijinal metin no: [31a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Asvador v. Bican’ın kiremithanede çalıştırdığı Tanaş v. Dado’ya olan işçilik ücretini ödemesi

Havâss-ı Aliyye kazâsına tâbi‘ kasaba-i Hasköy sükkânından işbu râfi‘ü’r-rakīm Tanaş v. Dado nâm zimmî meclis-i şer‘-i şerîfde kasaba-i mezbûrede sâkin kiremitçi tâifesinden Asvador v. Arıcan nâm Ermeni muvâcehesinde üzerine da‘vâ ve takrîr-i kelâm edip mezbûr Asvador kasaba-i mezbûrede vâki‘ kiremit kârhânesinde on beş gün hizmet etmek üzre üç yüz akçe ve bir def‘a dahi on beş gün hizmet etmek üzre üç yüz akçeye beni istîcâr edip ben dahi îcâr ve zikr olunan günlerde edâ-i hizmet edip hâlâ ücretim olan altı yüz akçe hakkımı mezbûrdan taleb eylediğimde edâdan imtinâ‘ eder suâl olunup alıverilmek matlûbumdur dedikde gıbbe’s-suâl ve akībe’l-inkâr isre talebi’l-beyyine merkūm Tanaş ityân-ı beyyineden izhâr-ı acz ile istihlâf etmeğin mersûm Tanaş ber vech-i muharrer on beş günden iki def‘a otuz günde (...) [altı yüz] akçe ücret ile istîcâr edip ve edâ-i hizmet eylemediğine mesfûr Asvador’a yemîn teklîf olundukda. ol dahi yemînden (...) [nükûl etmeğin] mûcebiyle meblağ-ı mezkûr altı yüz akçeyi merkūm Tanaş’a edâya mesfûr Asvador’a tenbîh birle mâ cerâ gıbbe’t-taleb kayd şüd. (…) [Fi’l-yevmi]’s-sâmin aşer min Şevvâli’l-mükerrem li sene tis‘în ve elf.


Şuhûdü’l-hâl: Es-Seyyid Abd(…) b. Eyüb, Mehmed b. Mahmud, Ali b. Abdullah, Hasan b. Abdullah ve gayruhüm.