Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 350 Hüküm no: 402 Orijinal metin no: [55b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vârissiz ölen Ahmed Çelebi b. Mehmed’in evinin beytülmâl tarafından Ali Beşe b. Ömer’e satıldığı Mahmiye-i İstanbul’da yeniçeri beytülmâli emîni olup mahmiye-i mezbûrede ve etrâfından medâyin ve kasabâtdan bilâ-vâris vefât edenlerin muhallefâtını beytülmâl için kabza memûr olan Mehmed Ağa meclis-i şer‘-i şerîfde bostancı oturaklarından bâ‘isü’l-kitâb Ali Beşe b. Ömer nâm kimesne mahzarında ikrâr ve takrîr-i kelâm edip mahrûse-i Üsküdar’da Mirahor mahallesi ahâlîsinden olup Mısr-ı Kahire’de bilâ-vâris fevt olan Ahmed Çelebi b. Mehmed Dede’nin beytülmâle âid muhallefâtından olup mahalle-i mezbûrede vâki‘ iki tarafdan merkūm Ali Beşe mülkü ve bir tarafdan el-Hâc Ebûbekir mülkü ve bir tarafından tarîk-i âm ile mahdûd bir bâb fevkānî ve bir bâb tahtânî odaları ve bir mikdâr sâdeyi ve bir kenîfi müştemil menzili beytülmâl için kabz ve beyne’t-tâlibîn mecma‘-ı nâs olan yerlerde kirâren ve mirâren müzâyede edip semen-i misli yüz on altı esedî guruşda mezbûr Ali Beşe üzerinde karâr edip rağabât-ı nâs bi’l-külliye münkatı‘a olup ziyâde ile tâlib bulunmamağın menzil-i mezbûru bi cümleti’t-tevâbi‘ ve’l-levâhık yüz on altı esedî guruş ile min haysi’l-kemiyyeti mechûle ve min haysi’l-işâre ma‘lûme meclis-i bey‘de mevcûde ve müşârün-ileyhâ ba‘de’l-kabz mudî‘a bir kabza fülûsa mezbûr Ali Beşe’ye bâtten bey‘ ve teslîm edip iştirâ ve tesellüm eyledikden sonra meblağ-ı mezbûr yüz on üç esedî guruşu yedinden tamâmen ahz u kabz eyledim min ba‘d menzil-i mahdûd-ı mezbûr merkūm Ali Beşe’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin min Recebi’l-mürecceb li sene seb‘a ve seb‘în ve elf. Şuhûdü’l-hâl: Yahya b. Mahmud, Hacı Ebûbekir b. Mustafa, Mehmed Çelebi b. İbrahim, Mehmed Çelebi b. Hasan, Muharrem b. Abdullah, Mehmed b. Ebûbekir, Eyüb Çelebi b. Süleyman, Mustafa b. Ebûbekir.