|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 222 Hüküm no: 209 Orijinal metin no: [31a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
İbrahim b. Mustafa ve Mehmed b. Bayram’ın, Ahmed Çavuş b. Ebûbekir’e borçlarını ödemesi
Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Câmi‘-i Kebîr mahallesinde sâkin işbu râfi‘ü’l-kitâb Ahmed Çavuş b. Ebûbekir nâm kimesne mahfil-i kazâda İbrahim b. Mustafa ve Mehmed b. Bayram nâm kimesneler mahzarlarında üzerlerine da‘vâ ve takrîr-i kelâm edip mezbûrân İbrahim ve Mehmed ale’l-iştirâki’s-seviy târih-i kitâbdan altı ay mukaddem benden iştirâk ve ahz ve kabz ettikleri nev‘ ve kadri beynimizde ma‘lûm emti‘a semeninden bin dört yüz yirmi altı akçe hakkım olup meblağ-ı mezkûrun târih-i mezkûrda kırk altı akçesini mezbûrân yedlerinden ahz ve kabz edip bâkī zimmetlerinde bin üç yüz seksen akçe hakkım kalmışidi hâlâ taleb eylediğimde edâdan imtinâ‘ ederler suâl olunup alıverilmek matlûbumdur dedikde gıbbe’s-suâl mezbûrân İbrahim ve Mehmed cevâblarında zikr olunan emti‘a semeninden müdde‘î-i mezbûr Ahmed Çavuş’a meblağ-ı bâkī-i mezkûr bin üç yüz seksen akçe zimmetimizde lâzımü’l-edâ ve vâcibü’l-kazâ deynim vardır deyû her biri tav‘an ikrâr etmeğin alâ mûcebi ikrârihimâ meblağ-ı mezkûr bin üç yüz seksen akçeyi mezbûr Ahmed Çavuş edâ ve teslîme merkūmân İbrahim ve Mehmed’e tenbîh birle mâ hüve’l-vâki‘ kayd şüd. Fi’l-yevmi’s-sâmin ve’l-ışrîn min Şevvâli’l-mükerrem li sene tis‘în ve elf.
Şuhûdü’l-hâl: Hüseyin b. Ali Ser-bölük, Ali b. Mehmed, Hüseyin b. Mehmed, Mehmed b. Eyüb, Ali b. Abdullah ve gayruhüm.
|