|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 223 Hüküm no: 211 Orijinal metin no: [31a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Fâtıma bt. Mehmed’in eski kocasından alacağı için Havva bt. Abdi’yi vekil tayin etmesi
Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Takyecibaşı mahallesi sâkinelerinden Fâtıma bt. Mehmed nâm hâtun meclis-i şer‘-i şerîfde yine mahalle-i mezbûrede sâkine işbu râfia‘tü’l-kitâb Havva bt. Abdi nâm hâtun mahzarında takrîr-i kelâm edip zevc-i mutallıkım olup mahmiye-i İstanbul’da Fenerkapısı dâhilinde sâkin gāib ani’l-meclis Abdülbâkī b. Kara Sefer nâm kimesne zimmetinde karz-ı şer‘îden altmış esedî guruş ve menzil bahâsından doksan dört esedî guruş ki cem‘an yüz elli dört esedî guruş hakkım ile bir sîm kilâbdân ve bir sîm buhurdân ve sekiz miskāl bir altın bilezik ve bir altın bıçağa müte‘allika da‘vâ-yı şer‘iyyem olmağla meblağ-ı mezbûr ile eşyâ-i merkūmeyi mezbûr Abdülbâkī’den taleb ve da‘vâya ve ahz ve kabza ve bana îsâle ve lede’l-hükkâmi’l-kirâm mürâfa‘a ve muhâsamaya ve ahz ve kabz ve îsâl mütevakkıf olduğu umûrun küllîsine mezbûre Havva’yı tarafımdan vekîl ve nâib-i menâb nasb ve ta‘yîn eyledim dedikde ol dahi vekâlet-i merkūmeyi kabûl ve levâzımını edâya müte‘ahhid olmağın mâ vaka‘a bi’l-ibtigā kayd şüd. Fi’l-yevmi’t-tâsi‘ ve’l-ışrîn min Şevvâli’l-mükerrem li sene tis‘în ve elf.
Şuhûdü’l-hâl: Mehmed b. Mahmud, Mehmed b. Eyüb, Ali b. Abdullah, Ali b. İslâm.
|