|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 223 Hüküm no: 212 Orijinal metin no: [31a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
İftihar bt. Abdullah’ın eski kocasından alacağı için Havva bt. Abdi’yi vekil tayin etmesi
Mahmiye-i İstanbul’da Tercüman câmi‘i kurbunda Yazıcı mahallesinde sâkine İftihar bt. Abdullah nâm hâtun meclis-i şer‘-i şerîfde medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Takyecibaşı mahallesi sâkinelerinden işbu râfi‘atü’l-kitâb Havva bt. Abdi nâm hâtun mahzarında takrîr-i kelâm ve ta‘bîr ani’l-merâm edip zevc-i mutallıkım olup mahmiye-i mezkûrede Fenerkapısı dâhilinde sâkin gāib ani’l-meclis Abdülbâkī b. Kara Sefer nâm kimesne ile emlâkimden bir mücevher kuşak ve sâir beynimizde ma‘lûm eşyâya müte‘allika da‘vâ-yı şer‘iyyem olmağla mezbûr Abdülbâkī’den taleb ve da‘vâya ve ahz ve kabza ve bana îsâle ve lede’l-hükkâmi’l-kirâm mürâfa‘a ve muhâsamaya ve kabz ve îsâl mütevakkıf olduğu umûrun küllîsine merkūme Havva’yı tarafımdan vekîl ve nâib-i menâb nasb ve ta‘yîn eyledim dedikde ol dahi vekâlet-i merkūmeyi kabûl ve levâzımını edâya müte‘ahhide olmağın mâ cerâ bi’l-ibtigā ketb olundu. Fî selhi Şevvâli’l-mükerrem li sene tis‘în ve elf.
Şuhûdü’l-hâl: Mehmed b. Mahmud, Mehmed b. Eyüb, Ali b. İslâm, Ali b. Abdullah ve gayruhüm mine’l-hâzırîn.
|