.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 224
Hüküm no: 213
Orijinal metin no: [31a-6]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Yagone bt. Yanaki’nin terekesinden olan evin Kostantin v. Yani’ye satılması

Mahmiye-i İstanbul hısnı ebvâbından Eğrikapı dâhilinde Avcıbey mahallesinde sâkine iken bundan akdem hâlike olan Yagone bt. Yanaki nâm Nasrâniyye’nin verâseti sadriye kebîre kızı Arkondon bt. Yani nâm Nasrâniyye ile sadrî kebîr oğlu Asan’a münhasıra olduğu şer‘an zâhir ve mütehakkik oldukdan sonra merkūm Asan asâleten ve merkūme Arkondin’in zevci ve tarafından husûs-ı âti’l-beyâna vekîl olup Hürmüz v. Dimitri ve Kostiye v. Dimo nâm zimmîler şehâdetleriyle şer‘an vekâleti sâbite olan Arkondin v. Yani nâm zimmî vekâleten meclis-i şer‘-i şerîfde râfi‘ü’r-rakīm Kostantin v. Yani nâm zimmî muvâcehesinde her biri bi’l-asâle ve bi’l-vekâle ikrâr-ı tâm ve takrîr-i kelâm edip hâlik-i merkūmun terekesinden olup Havâss-ı Aliyye kazâsına tâbi‘ Terkos nâhiyesi müzâfâtından Aya Yorgi nâm karyede vâki‘ bir tarafı Hürmüz mülkü ve bir tarafı kürkçü nâm Nasrânî mülkü ve bir tarafı Nikola harmanı ve bir tarafı tarîk-i âm ile mahdûd bir bâb tahtânî oda ve bir mikdâr havluyu müştemil mülk-i mevrûsumuz olan menzili cemî‘ tevâbi‘i ile merkūm Kostantin’e on üç esedî [31b] guruşa tarafından îcâb ve kabûlü hâvî bey‘-i bâtt-ı sahîh-i şer‘îyle bey‘ ve teslîm ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr on üç guruşu merkūm Kostantin yedinden tamâmen ahz ve kabz edip bi’l-farîzati’ş-şer‘iyye beynimizde iktisâm eyledik ba‘de’l-yevm sâlifü’z-zikr menzil merkūm Kostantin’in mülk-i müşterâsıdır keyfe mâ yeşâ’ ve yehtâr mutasarrıf olsun dedikde gıbbe’t-tasdîki’ş-şer‘î bi’t-taleb ketb olundu. Fi’l-yevmi’s-sâmin ve’l-ışrîn min Şevvâli’l-mükerrem li sene tis‘în ve elf.


Şuhûdü’l-hâl: Molla Ahmed b. Mustafa, Molla İbrahim b. Mustafa ve gayruhüm mine’l-huzzâr.