.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 224
Hüküm no: 214
Orijinal metin no: [31b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ahmed Çelebi b. Mustafa’yı darp eden Hacı Hasan b. Ahmed’e tâzir cezası verilmesi

Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de [Ba]ba Haydar Mescidi zâviyesinin bi’l-fi‘l mütevellîsi olan râfi‘ü’l-kitâb Ahmed Çelebi b. Mustafa nâm kimesne meclis-i şer‘-i hatîr-i lâzımü’t-tevkīrde mahalle-i mezbûre sâkinlerinden el-Hâc Hasan b. Ahmed nâm kimesne mahzarında üzerine da‘vâ ve takrîr-i kelâm edip işbu yedimde olan hüccet-i keşf mûcebince zâviye-i mezkûrenin bir kenîf ve bir matbahını ber mûceb-i şart-ı vâkıf zâviye-i mezkûre ile ma‘an zabt ve tasarruf ettirmek murâd ettiğimde, mâni‘ olmağın şer‘-i şerîfe da‘vet ettiğimde benim seninle da‘vâm yokdur deyip yumruk ile çeneme ve tepme ile kasığıma darb eyledi suâl olunup mûceb-i şer‘îsi icrâ olunmak matlûbumdur dedikde gıbbe’s-suâl ve akībe’l-inkâr, isre talebi’l-beyyine yine mahalle-i mezbûre sâkinlerinden Mustafa Çelebi b. Receb ve Hâfız Osman b. Ahmed nâm kimesneler li ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müdde‘î-i merkūm Ahmed Çelebi mezbûr el-Hâc Hasan’ı husûs-ı mezbûr için şer‘-i şerîfe da‘vet ettikde mezbûr el-Hâc Hasan müdde‘î-i merkūm Ahmed Çelebi’ye, benim seninle da‘vâm yokdur deyip bizim huzûrumuzda yumruk ile çenesine ve tepme ile kasığına darb eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylelediklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâkı‘a olmağın mûcebiyle mezbûr el-Hâc Hasan’ın ta‘zîrine tenbîh birle mâ vaka‘a kayd şüd. Fi’l-yevmi’s-sânî min Zilka‘deti’ş-şerîfe li sene tis‘în ve elf.


Şuhûdü’l-hâl: Hasan Ağa b. ( ), Hasan Efendi b. Veli, Mustafa Çelebi b. Sunullah, Hasan Çelebi b. Hüseyin, Mustafa b. Ali, Ali Efendi b. Hüseyin ve gayruhüm.