.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 225
Hüküm no: 215
Orijinal metin no: [31b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Polimez v. Yorgi’nin bazı mülk ve eşyalarını kardeşi Dimitri’ye satması

Vilâyet-i Rumeli’nde Mizistre kazâsına tâbi‘ Perastos nâm karye ahâlîsinden Polimez v. Yorgi nâm zimmî meclis-i şer‘-i hatîr-i lâzımü’t-tevkīrde li ebeveyn er karındaşı râfi‘ü’r-rakīm Dimitri nâm zimmî muvâcehesinde tâyi‘an ikrâr-ı tâm ve takrîr-i kelâm edip akd-i âti’l-beyânın sudûruna değin ale’l-iştirâki’s-seviy karındaşım merkūm Dimitri ile silk-i mülk-i sahîhimizde münselik olup karye-i mezbûrede vâki‘ bir tarafdan Nikola [v.] Ciclo nâm zimmî mülkü ve bir tarafdan Yani [v.] Yorgi nâm zimmî mülkü ve bir tarafdan Nikola [v.] Petle nâm zimmî mülkü ve bir tarafdan tarîk-i âm ile mahdûd menzil ile içinde mevcûd olup adedi ve vasıf ve cinsi beynimizde ma‘lûm eşyâda olan nısf hisse-i şâyi‘am ile yine karye-i mezbûrede vâki‘ lede’l-ahâlî ma‘lûmü’l-hudûd bir kıt‘a mülk bağda olan nısf hisse-i şâyi‘am ile yine karye-i mezbûrede vâki‘ lede’l-ahâlî ma‘lûmü’l-hudûd bir kıt‘a mülk bağda olan nısf hisse-i şâyi‘amı dahi cemî‘ hukūk ve rüsûm ile karındaşım merkūm Dimitri’ye sekiz bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bi safkatin vâhidetin bey‘ edip ol dahi minvâl-i muharrer üzre iştirâ ve kabûl eyledikden sonra mahmiye-i İstanbul’da Unkapanı kurbunda vâki‘ merhûme ve mağfûrun-lehâ Haseki Sultan vakfı’ndan icâre-i mu‘accele ve müeccele ile ber vech-i iştirâk taht-ı tasarrufumuzda olup hudûdu beynimizde ma‘lûm bir bâb mahzende olan rub‘ hissede nısf hisse-i şâyi‘amın hakk-ı tasarrufunu ma‘rifet-i mütevellî-i vakf-ı mezbûr ile karındaşım merkūm Dimitri’ye iki bin akçe bedel mukābelesinde ferâğ ve tefvîz ol dahi vech-i muharrer üzre tefevvuz ve kabûl edip semen-i mezbûr ile bedel-i mezkûr ki cem‘an on bin akçeyi mersûm Dimitri yedinden tamâmen ahz ve kabz eylediğimden sonra emlâk-i mezbûrede olan nısf hissemi mahallinde zabt ve tasarrufa merkūm Dimitri’yi taslît eyledim keyfe mâ yeşâ’ mutasarrıf olup sâlifü’z-zikr mahzenin rub‘unda olan nısf hisseye dahi emsâli gibi mutasarrıf olsun dedikde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’s-sânî min Zilka‘deti’ş-şerîfe li sene tis‘în ve elf.


Şuhûdü’l-hâl: Mehmed b. Eyüb, Hasan b. Abdullah, Ali b. Abdullah, Mehmed b. Mahmud ve gayruhüm mine’l-huzzâr.