.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 226
Hüküm no: 216
Orijinal metin no: [31b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Balcızâde Mehmed Çelebi’nin Haydar Ağa Çeşmesi para vakfına borçlu olması

Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de merhûm Zal Mahmud Paşa câmi‘-i şerîfi kurbunda sâkin olup medîne-i mezbûrede Kiremitçi Süleyman mahallesinde merhûm Haydar Ağa binâ eylediği çeşmenin nukūd-ı mevkūfesine bi’l-fi‘l hasbî mütevellî olan Balcızâde demekle ma‘rûf Mehmed Çelebi b. el-Hâc Osman nâm kimesne meclis-i şer‘-i şerîf-i enverde çeşme-i mezkûre evkāfına hasbî nâzır olan ahâlî-i mahalle-i mezbûreden işbu bâ‘isü’l-kitâb Mehmed Efendi b. Yusuf ve Mustafa Çelebi b. Mehmed ve İbrahim Bey b. Abdullah ve Mehmed Çelebi b. Hasan nâm kimesneler mahzarlarında tâyi‘an ikrâr-ı tâm ve takrîr-i kelâm edip çeşme-i mezkûrenin meremmâtına merhûm-ı mezbûrun vakf eylediği yüz esedî guruş ile bundan akdem kendi malımdan vakf eylediğim yüz esedî guruş ki cem‘an iki yüz esedî guruşu kendi mesârifime sarf ve istihlâk etmem ile hâlâ cânib-i vakf-ı mezkûra zimmetimde lâzımü’l-kazâ deynimdir dedikde mâ cerâ ahâlî-i mahalle-i merkūme talebleriyle gıbbe’t-taleb kayd şüd. Fi’l-yevmi’s-sâlis min Zilka‘deti’ş-şerîfe li sene tis‘în ve elf.


Şuhûdü’l-hâl: Zahrü’l-akrân Mustafa Ağa, Ahmed Efendi b. Mustafa, Mehmed Çelebi b. Mehmed, Ahmed Çelebi b. Mehmed, Mustafa Beşe b. Ahmed Serdâr, Hasan b. Abdullah.