|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 226 Hüküm no: 217 Orijinal metin no: [31b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Efendisi İsmail Bey’in eşyasını çalıp kaçan Şahbaz bt. Abdullah adlı cariyenin hür olduğu iddiasını ispatlaması gerektiği
Mahmiye-i İstanbul’da Şehremîni kurbunda Cafer Ağa mahallesi sükkânından işbu râfi‘ü’l-kitâb İsmail Bey b. Ahmed nâm kimesne mahfil-i kazâda Şahbaz bt. Abdullah mahzarında takrîr-i kelâm ve bast-ı merâm edip merkūme Şahbaz câriye-i memlûkem olup târih-i kitâbdan on iki gün mukaddem mahalle-i mezkûrede vâki‘ menzilimde emlâkimden işbu billur zarflı bir sâ‘at ve bir sîm ön kuşak ve bir altın ve bir alaca sandal entari ve bir köhne sandal zıbın ve bir köhne şade? ve bir köhne gömleğimi ahz ve kabz edip firâr etmişidi hâlâ medîne-i Hazret-i Ebâ Eyyûb-i Ensârî’de İslâm Bey mahallesi ahâlîsinden hâzırân bi’l-meclis Şâhin v. ( ) nâm zimmî ile zevcesi Drako bt. Hristo nâm Nasrâniyye’nin sâkin oldukları menzilde buldum suâl olunsun dedikde gıbbe’s-suâl merkūme Şah[baz] cevâbında fi’l-hakīka ben müdde‘î-i mezbûr İsmail Bey’in câriye-i memlûkesi olmak üzre taht-ı yedinde olup gāibân ani’l-meclis iken zimmîler iğvâsıyla vakt-i mezkûrda eşyâ-i mersûmeyi ahz ve firâr etmişidim [32a] eşyâ-i mezkûre müdde‘î-i mezkûrun mal-ı mahzı ve hakk-ı sırfı olduğu mukarrer lâkin ben fi’l-asl vilâyet-i Rumeli’nde Premedi kasabasında Kasım Çelebi mahallesinde sâkine olup babamın ismi Hasan ve anamın ismi Meryem ve dedemin ismi Hüseyin ve maskat-ı re’sim zikr olunan Kasım Çelebi mahallesi olmağla hürretü’l-asl iken zevcim Mustafa nâm kimesne beni Edirne’ye getirip ardımdan câriye olmak üzre bey‘ etmek ile tedâvül-i eydî ile müdde‘î-i mezbûr İsmail Bey’in yedine düşdüm hâlâ ben vech-i meşrûh üzre hürretü’l-aslım, mezbûr İsmail Bey bana bi gayri hakkın vaz‘-ı yed eder deyicek isre’l-istintâk ve akībe’l-inkâr ve gıbbe talebi’l-beyyine merkūme Şahbaz ba‘de’l-istimhâl mehl-i şer‘î ile imhâl olundukdan sonra ityân-ı beyyineden izhâr-ı acz ile istihlâf etmeğin fi’l-vâki‘ merkūme Şahbaz’ın ber vech-i muharrer hürretü’l-asl olduğunu bilmediğine mezbûr İsmail’e yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebiyle mezbûr İsmail Bey’e bilâ-beyyine mu‘ârazadan merkūme Şahbaz’ı men‘ birle mâ cerâ kayd şüd.
Şuhûdü’l-hâl: Es-Seyyid Abdurrahman Efendi el-İmâm, çorbacı İsmail Ağa b. Mustafa, Mustafa Beşe b. Osman, Hâfız Mehmed Efendi b. Ahmed el-İmâm ve gayruhüm mine’l-huzzâr.
|