|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 227 Hüküm no: 218 Orijinal metin no: [32a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hacı Ali b. Abdullah’ın ev hissesini karısı Canfedâ bt. Abdullah’a satması
Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Kasım Paşa mahallesinde sâkin el-Hâc Ali b. Abdullah nâm kimesne meclis-i şer‘-i hatîr-i lâzımü’t-tevkīrde zevcesi işbu bâ‘isetü’l-kitâb Canfedâ bt. Abdullah nâm hâtun mahzarında tav‘an ikrâr-ı tâm ve takrîr-i kelâm edip medîne-i mezbûrede Serv[i] mahallesinde vâki‘ bir tarafdan Havva nâm hâtun ve bir tarafdan Mehmed nâm kimesne mülkü ve iki tarafdan tarîk-i âm ile mahdûd fevkānî ve tahtânî üç bâb odalarda olan seksen dört sehim hisse-i şâyi‘amı zevcem merkūme Canfedâ’ya iki bin yüz fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezkûr iki bin yüz akçeyi mezbûre Canfedâ yedinden tamâmen ahz ve kabz eyledim ba‘de’l-yevm sâlifü’z-zikr seksen dört sehim hissem zevcim merkūme Canfedâ’nın mülk-i müşterâsıdır keyfe mâ yeşâ’ mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb kayd şüd. Fi’l-yevmi’s-sâdis min Zilka‘deti’ş-şerîfe li sene tis‘în ve elf.
Şuhûdü’l-hâl: Mehmed Efendi b. Nasuh, İbr[ahim] Efendi b. Hasan, Mehmed Çelebi b. Ahmed, Hasan Beşe b. Hüseyin, es-Seyyid Ârif Çelebi b. Mustafa, Hasan b. Abdullah, Mehmed b. Eyüb.
|