|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 228 Hüküm no: 219 Orijinal metin no: [32a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Süleyman b. Mehmed’in, ev, tarla ve bağlarını Mehmed b. Hasan, Ahmed b. Ali ve Kasım b. Mehmed’e satması
Vilâyet-i Rumeli’nde Bihişte kazâsına tâbi‘ Podokar nâm karye ahâlîsinden Süleyman b. Mehmed nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Mehmed b. Hasan ve Ahmed b. Ali ve Kasım b. Mehmed nâm kimesneler asâleten ve diğer Kasım b. Hasan tarafından husûs-ı âti’l-beyâna vekîl olup hasm-ı câhid mahzarında Hüseyin b. İlyas ve Hasan b. Ali şehâdetleriyle şer‘an vekâleti sâbite olan mezbûr Ahmed mahzarında tav‘an ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk ve zabt ve tasarrufumda olup karye-i mezbûre vâki‘ bir tarafdan Mustafa b. Abdullah mülkü ve bir tarafdan Edhem [b.] Pervâne mülkü ve bir tarafdan Hüseyin mülkü ve bir tarafdan tarîk-i âm ile mahdûd üç fevkānî odaları ve anbarı ve havluyu müştemil menzilimi cemî‘ tevâbi‘ ve levâhıkı ile ve karye-i mezbûrede mevâzi‘-i müteferrikada vâki‘ hudûdu beynimizde ma‘lûm bir kıt‘a mülk samanlık ve bir kıt‘a harman yerini ve bir kıt‘a mülk bostan yerini ve yine karye-i mezbûrede vâki‘ bir tarafı Koçu b. Hüsrev bağı ve bir tarafı tarîk-i âm ile mahdûd tahmînen on beş çapalık bir kıt‘a mülk bağ ile yine karye-i mezbûrede vâki‘ bir tarafdan Mehmed b. Kasım bağı ve bir tarafdan Murad b. Hüseyin bağı ve iki tarafdan tarîk-i âm ile mahdûd bir kıt‘a mülk bağımı dahi mezbûrûn Mehmed ve Ahmed ve Kasım’a ve diğer Kasım’a ale’l-iştirâki’s-seviy bi safkatin vâhidetin yüz kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip anlar dahi minvâl-i muharrer üzre iştirâ ve kabûl eyledikden sonra yine karye-i mezbûre sınırı dâhilinde mevâzi‘-i adîdede vâki‘ lede’l-ahâlî ma‘lûmü’l-hudûd bir kıt‘a çayır ile tahmînen otuz pulluk tarlalarımın dahi hakk-ı tasarruflarını ma‘rifet-i sâhib-i arz ile merkūmûn Mehmed ve Ahmed ve Kasım’a ve diğer Kasım’a yüz esedî guruş bedel mukābelesinde tefvîz ve ferâğ edip anlar dahi ale’l-iştirâki’s-seviy ber vech-i muharrer tefevvuz ve kabûl eyleyip semen-i mezbûr ile bedel-i merkūm ki cem‘an iki yüz guruşu mezbûrûn Mehmed ve Ahmed ve Kasım yedlerinden tamâmen ahz u kabz eyledikden sonra zikr olunan emlâk ve arâziyi mahallinde zabt ve tasarrufa merkūmûn Mehmed ve Ahmed ve Kasım ve diğer Kasım’ı taslît eyledim dedikde gıbbe’t-tasdîki’ş-şer‘î mâ vaka‘a bi’l-ibtigā kayd şüd. Fi’l-yevmi’l-hâmis min Zilka‘deti’ş-şerîfe li sene tis‘în ve elf.
Şuhûdü’l-hâl: Ali Beşe b. Hasan, Sefer b. Mehmed, Nasuh b. Ahmed, Abdullah b. Hasan, Mehmed b. Eyüb ve gayruhüm.
|